ناوەڕۆکی کۆبوونەوەکەی یەکێتی و پارتی دەخرێتەڕوو

SNN

لەدوای کۆبوونەوەکەی شاندی یەکێتی و پارتی لە سلێمانی، وتەبێژی ئەو دوو حزبە ناوەڕۆکی کۆبوونەوەکەیان خستەڕوو و ئاماژەیان بەوەکرد کۆبوونەوەکە لەپێناو دروستکردنی یەکریزی بووە.

ئەمین بابەشێخ، وتەبێژی یەکێتی لە کۆنفرانسێکی رۆژنامەوانیدا رایگەیاند: “هەموو هەوڵێکمان بۆ ئەوەیە لە هەرێم و بە‌غدا یەکریزبین”، ئەوەشی ئاشکراکرد کە یەکێتی لە بەرنامەیدایە سەردانی هەموو لایەنە کوردستانییەکان بکات بەڵام بۆ ئەوە چاوەڕوانی ئەنجامی هەڵبژاردنەکەی دەکرد، لەبارەی ئەو دەستپێشخەریەی پارتیشەوە وتی: “پێشوازی لە هەموو دەستپێشخەریەک دەکەین و گەشبینین”.

هاوکات مەحمود محەمەد، وتەبێژی پارتیی لە کۆنفرانسەکەدا سوپاسی پێشوازیەکەی شاندی یەکێتی کرد و وتیشی: “سەردانەکەمان دۆستانەیە، بۆپ رەواندنەوەی ئەو نیگەرانیانەیە کە لە هەڵمەتی هەڵبژاردندا دروستبووبوو”.

مەحمود محەمەد وتیشی لە کۆبوونەوەکەدا باس لە پۆستی سەرۆککۆماری عێراق نەکراوە، رایگەیاند: “ئەو پۆستە پشکی کوردە بەڵام مەرج نییە بۆ لایەنێکی دیاریکراوبێت”.

ئەمە لەکاتێکدایە پارتی بەنیازە ئەمڕۆ لەگەڵ گۆڕانیش کۆببێتەوە و دواتر سەردانی لایەنەکانی دیکە دەکات.