غازی کەرکوکی: دوورخستنەوەی لاهور جەنگی بڕیارێکی پێویست بوو

عەلی حەمەسەعید-SNN

ئەندامێکی سەرکردایەتی یەکێتی ئاماژە بەوەدەکات بڕیاری دوورخستنەوەی لاهور جەنگی و ژمارەیەک لە ئەندامانی سەرکردایەتی یەکێتی بڕیارێکی پێویست بوو، چونکە ئەوان ئەوکاتەی یەکێتی پێویستی پێیان بوو ئەوان لە دژی یەکێتی کاریان دەکرد.

غازی کەرکوکی، ئەندامی سەرکردایەتی یەکێتی بە SNNی ڕاگەیاند: ئەو بڕیارەی لەلایەن سەرکردایەتی یەکێتی و مەکتەبی سیاسی یەکێتییەوە دەرکراوە سەبارەت بە دوورخستنەوەی لاهور شێخ جەنگی و ژمارەیەک لە ئەندامانی سەرکردایەتی یەکێتی بڕیارێکی پێویست و لەجێگەی خۆیدا بوو، دەبوو زووتر ئەو بڕیارەیان دەربکردایە.

ئاماژەی بەوەشکرد، بڕیاری دوورخستنەوەی ئەو کەسانە لە یەکێتی بەبێ هۆ نییە و لەلایەن تاکە کەسێکیشەوە دەرنەکراوە، بەڵکوو بە ڕەزامەندی سەرکردایەتی و سەرۆکی یەکێتی دەرکراون ئەوەش لای هەموو کەس ڕوونە، کە بۆچی یەکێتی گەیشتە ئەو بڕیارەی ئەو کەسانە دوور بخاتەوە.

ئەو ئەندامەی سەرکردایەتی یەکێتی ئەوەشی خستەڕوو، کاتێک لە هەڵمەتەکانی هەڵبژاردن یەکێتی پێویستی بەو کەسانە هەبوو کە ئێستا دەرکراون پاڵپشتی بکەن بەڵام ئەوان نەک پشتگیری یەکێتیان نەکرد بەڵکوو بەهەموو توانایەکیانەوە دژایەتی یەکێتیان کرد بەو ئامانجەی یەکێتی شکست بهێنێت، بەڵام خەونەکەیان نەهاتەدی بۆیە ئێستا کاتی ئەوەیە کە بە بڕیارێکی حزبی ئەوکەسانە دوور بخرێنەوە و و بڕیارێکی گونجاو و پێویستیش دراوە.