كۆمسیۆن بەفەرمی سەركەوتنی دوو كاندیدی یەكێتی راگەیاند

SNN-عەلی حەمە سەعید

دوای ئەوەی لەسەر تانەی دوو كاندیدی یەكێتی لە پارێزگای هەولێرو مووسڵ كۆمیسۆن پێداچوونەوەی بە تانەكاندا كرد دەركەوت كە بەهۆی بوونی ژمارەیەكی زۆر لە پەنجەمۆری دووبارە، دوو كاندیدی یەكێتی سەردەكەون و دوو كاندی پارتیش دادەبەزن، كۆمیسیۆنی باڵای سەر بەخۆی هەڵبژاردنەكانیش بەفەرمی ئەو گۆڕانكارییەی راگەیاند.

بە گوێرەی ئەو زانیارییانەی كە لە سكاڵاكارانی یەكێتی بە SNNدراون جەخت لەوەكراوەتەوە: كە دادگای تایبەت بە كۆمیسیۆنی باڵای سەربەخۆی هەڵبژاردنەكان، لە بەرژەوەندی ئەوان سكاڵاكانی یەكلایی كردووەتەوە، بەجۆرێك كە یەكێتی نشتیمانی كوردستان لە پارێزگای هەولێر كورسییەك و لە پارێزگای موسڵیش كورسییەكی دیكەیان بۆ زیاد بووە.

بەگوێرەی چەند نوسراوێكی كۆمیسیۆنی باڵای سەربەخۆی هەڵبژاردنەكانی عێراق كە وێنەیەكیان لای SNNە ئەوە خراوەتەڕوو، لە بازنەی سێی هەولێر، (هەرێم كەمال ئاغا)، كاندیدی یەكێتی نیشتیمانی كوردستان لە شوێنی (لەیلا ئەكرەم سەعید)، كاندیدی پارتی دیموكراتی وكوردستان سەردەكەوێت.

هاوكات هەر بەگوێرەی ئەو نوسراوانەی كۆمسیۆن كە بڵاو كراونەتەوە لە بازنەی دووی نەینەوا (رۆنزی زیاد سیدۆ)، كاندیدی یەكێتی نشتیمانی كوردستان لە شوینی (عەبدولسەلام شەعبان محەممەد بەرزنجی)، كاندیدی پارتی سەردەكەوێت.

هەر بە گوێرەی نوسراوەكانی كۆمسیۆن كە بڕیاری لیژنەی دادوەری هەڵبژاردنەكانە لە بازنەی دووی كەركوك غەریب عەسكەر، كاندیدی هاوپەیمانیی فەتح لەشوینی سەوسەن عەبدولواحید شاكر، كاندیدی بەرەی توركمانی عێراق سەردەكەوێت.

گۆڕانكاریيەكان تا ئێستا لە شەش كورسی عێراق ئاشكرا بووە كە بەشێوەیەكە لە بازنەی چواری بەسرە رەفیق هاشم شناوە، كاندیدی هاوپەیمانیی فەتح لە بری هەیسەم عەبدولجەبار محەممەد، كاندیدی سەربەخۆ سەردەكەوێت.

لە بازنەی دووی بابل سادق مەدلول حەمەد، كاندیدی رەوتی حیكمەی نیشتمانی لەشوینی ئەمیر كامیل محەمەد، كاندیدی سەربەخۆ سەردەكەوێت.

هاوكات لە بازنەی شەشی بەغداش خالید عوبەیدی، كاندیدی هاوپەیمانیی عەزم لە بری عەباس حوسێن ساڵح، كاندیدی هاوپەیمانیی عەقدی وەتەنی سەردەكەوێت.

بەپێی ئەنجامە بەراییەكانی هەڵبژاردنی پەرلەمانی عێراق، رەوتی سەدر 73 كورسی، هاوپەیمانی تەقەدوم 37 كورسی، پارتی 33 كورسی و یەكێتی 16 كورسیان بەدەستهێنابوو، بەڵام لەدوای گۆڕانكارییەكان ژمارەی كورسیەكانی تەقەدوم دەبێتە 38 كورسی و پارتی كەمدەبێتەوە بۆ 31 كورسی و یەكێتیش كورسییەكان زیاد دەكەن بۆ 18 كورسی.