باڵانبۆ محەمەد بۆ هێڤیدار “ماڵت لە شوشەیە بۆیە بەرد مەگرە ماڵی خەڵکی”
باڵامبۆ محەمەد
SNN
باڵانبۆ محەمەد ئەندامی فراکسیۆنی یەکێتی لە پەرلەمانی کوردستان رایگەیاند: بە داخەوە تا ئێستا ئەم حکومەتە ئامادە نەبووە بودجە بنێرێتە پەرلەمانەوە، وا باشترە پەرلەمانتاران لە بری ئەوەی تەشهیر بکەن و قسە لەسەر بابەتی بێ بنەما بکەن، بەڵگە بدەن بە دەستەوە کە گەندەڵی لە خاڵە سنوورییەکان هەیە.
ئاماژەی بەوەشکرد: ئێمە بەرێز وەزیری سامانە سروشتییەکانمان بانگێشتی پەرلەمان کرد، باسی ئەوەی کرد کە دەستی ئەو کەسە دەبڕین گەندەڵی بکات، بەڵام وەک دەبینین نرخی نەوت لە بەرزیترین ئاستدایە و تا ئێستاش حکومەتی هەرێم چاوەڕوانی ئەوەیە 200 ملیارەکە لە بەغداو بێت، ئێمە دەپرسین ئەم پارەی نەوتە بۆ کوێ دەڕوات و عەدالەت بنوێنێت لە خزمەتگوزاری لە سەرجەم پارێزگاکان، بەڵام حکومەت زۆنی سەوزی پشتگوێ خستووە و تەگەرە دەخرێتە بەرەدەم پرۆژەکانی زۆری سەوز تا جێبەجێ نەکرێت.
ئەو ئەندامەی پەرلەمانی کوردستان دەربارەی قسەکانی هێڤیدار ئەحمەد کە پێشتر رایگەیاندبوو: تیمی وزاری یەكێتی لە حكومەتی هەرێمی كوردستان بە حكومەتیان وتووە ئەو شتانەی داخڵ دەكرێن قەدەغەیەو بە قاچاغ داخڵ دەكرێت ئێوە هەقتان چییە، وتی” هێڤیدار نەدەبوو بەو زمانە قسەی بکردایە و هەموو شتێک پێویستی بە بەڵگەیە، ئەگەر ئەو بەڵگەی هەیە لە زۆنی سەوز نا شەفافیەت هەیە، ئێمەش بەڵگەی تەواومان هەیە لە زۆنی زەرد ناشەفافیەت و گەندەڵییەکی زۆر و دوو قات هەیە، واباشتربوو هێڤیدار بیری لەوە بکردایەتەوە کە سەرچاوەی داهاتی هەرێم نەوتە و لە نەوتەوە دەستی پێبکردایە با بمانزانیایە ئەم داهاتی نەوتە چییە و بۆ کوێ دەڕوات، بۆیە بە هێڤیدار دەڵێم ماڵت لە شوشەیە بۆیە بەرد مەگرە ماڵی خەڵکی.
