“نوسراوێکی وەزارەتی دارایی لەبارەی مامۆستایانی وانەبێژ دوورە لە راستییەوە”
پۆلێکی خوێندنی بنەڕەتی
SNN
وەزیری پەروەردەی هەرێم رایگەیاند ئەو نوسراوەی کە دەوترێت وەزارەتی دارایی بڵاویکردووەتەوەوە سەبارەت بە پرسی چارەسەرکردنی کێشەی مامۆستایانی وانەبێژ راست نییە.
ئالان حەمەسەعید ئەمڕۆ لە میانی کۆنفرانسێکی رۆژنامەوانیدا وتی: “من لەگەڵ وەزیری دارایی کۆبوونەوەم ئەنجامداوە، نە قسەی وام لە وەزیری دارایی بیستووە، نە لێدوانی لەو شێوەیەی داوە”.
وەزیری پەروەردە وتی: “دەتوانم بەناوی وەزارەتی داراییەوە بڵێم کە وەزیری دارایی لێدوانی وای نەداوە”.
پێشتر نوسراوێک بڵاوکرایەوە کە وەزارەتی دارایی و ئابوری حکومەتی هەرێم رێنمایی دارایی بۆ کرێی مامۆستایانی وانەبێژی دانەمەزراو و چارەسەکردنی کێشەکانیان دەکردووە، لە نوسراوەکەدا هاتبوو: ” پاڵپشت بە نوسراوی ئەنجومەنی وەزیران و کۆنوسی کۆبونەوەی نێوان وەزارەتی دارایی و وەزارەتی پەروەردە لە 19ی 10ی 2021، شەش رێنمایی بۆ چارەسەری کێشەی مامۆستایانی وانەبێژ دەرچووە کە تایبەتە بە دیاریکردنی کرێی مامۆستایانی وانەبێژی دانەمەزراو بەپێی گوندو شارەدێ و سەنتەری پارێزگاکان و ئیدارە سەربەخۆکان و لەبەرچاوگرتنی بڕوانامە”.
