ساڵی ڕابردوو زیاد لە 107 هەزار ئۆتۆمبێل هاوردەی هەرێم كراون
SNN-عەلی حەمە سەعید
بەوتەی سەرۆكی یەكێتی هاوردە و هەناردەكارانی هەرێمی كوردستان لەماوەی 12 مانگی ساڵی رابردوو زیاد لە 107 هەزار ئۆتۆمبێل بەشێوەیەكی یاسایی و لەڕێگەی دەروازە سنورییەكانی هەرێمی كوردستانەوە هاوردەكراون كە زۆرترین ئۆتۆمبێل لە ڕێگەی دروازەی حاجی ئۆمەرانەوە بووە و لەمەرزی باشماخیشەوە زیاد لە 11 هەزار ئۆتۆمبێل هاوردەكراوە.
مستەفا عەبدولڕەحمان، سەرۆكی یەكێتی هاوردەو هەناردەكارانی هەرێمی كوردستان بە SNNی ڕاگەیاند: بەگوێرەی ئەو مەرج و ڕێنماییانەی كە لەوەزارەتی ناوخۆ و لایەنە پەیوەندیدارەكانی دیكەی هەرێمی كوردستانەوە درچوون، لەساڵی ڕابردوودا بەتێكڕا 107 هەزار و 159 ئۆتۆمبێلی جۆراو جۆر ل ڕێگای دەروازە سنورییەكانی حاجی ئۆمەران ئیبراهیم خەلیل باشماخ و پەروێزخانەوە هاوردەی هەرێمی كوردستان كراون.
ئاماژەی بەوەشكرد، بەگوێرەی ئامارەكانی بەردەستمان لەماوەی 12 مانگی ساڵی ڕابردوو لەكۆی ئەو 107 هەزار ئۆترمبێلەی هاوردەكراون زیاد لە 50 هەزار ئۆتۆمبێلیان لە مەرزی حاجی ئۆمەرانەوە هاوردەكراون بۆ ئەومەبەستەش تەنها لەو مەرزەوە 424 مۆڵەتی هاوردەكردنی ئۆتۆمبێل دراوە بە كۆمپانیاكان و لەمەرزی باشماخیش 209 مۆڵەت دراوەتە كۆمپانیاكان و تواندراوە 22 هەزارو 310 ئۆتۆمبێل هاوردە بكرێت.
سەرۆكی یەكێتی هاوردەو هەناردەكارانی هەرێمی كوردستان ئەوەشی خستەڕوو، هەر لەساڵی ڕابردوو لە مەرزی ئیبراهیم خەلیل 186 مۆڵەت دراوەتە كۆمپانیاكان بۆ هاوردەكردنی ئۆتۆمبێل و لەوماوەیەدا توانیویانە 20 هەزار و 639 ئۆتۆمبێل هاوردەبكەن، هاوكات لە مەرزی پەروێزخانیشەوە 102 مۆڵەت دەركراوە بەكۆمپانیاكان بۆ هاوردەكردنی ئۆتۆمبێل و لەوێش 11 هەزار و 842 ئۆتۆمبێل هاوردەكراوە.
