ئەمريکا داوای هەڵوێستی ناتۆ دەکات لەسەر روسيا

SNN

وەزیری دەرەوەی ئەمەریکا سەبارەت بە زیادبوونی هێزەکانی ڕوسیا لەسەر سنووری ئۆکرانیا قسەی لەگەڵ وڵاتانی ڕۆژهەڵاتی هاوپەیمانێتی ناتۆ کرد و داوای هەڵوێستێکی یەکگرتووی ناتۆی کرد بەرامبەر ڕوسیا.

نێد پڕایس وتەبێژی وەزارەتی دەرەوەی ئەمەریکا رايگەياند: لە پەیوەندییەکی تەلەفونیدا لەگەڵ 9 وڵاتی ڕۆژهەڵاتی ئەوروپا کە ئەندامن لە هاوپەیمانێتی ناتۆدا، ئەنتۆنی بلینکن وەزيری دەرەوەی ئەمريکا وتوویەتی ئەمەریکا پابەندە بەوەی لەنزیکەوە ڕاوێژکاری و هەماهەنگی لەگەڵ سەرجەم هاوپەیمانان و هاوبەشەکاندا بکات، لەکاتێکدا لەڕێی بەربەست دانان و بەرگری و گفتوگۆکردنەوە گرژییەکان کەم دەکەینەوە.
وتیشی ” بلینکن داوای هەڵوێستێکی یەکگرتوو و ئامادە و یەکلاکەرەوەی ناتۆی کردووە بۆ بەرگریی گشتی هاوپەیمانان، جەختی لە پشتیوانی نەگۆڕی ئەمەریکا کردەوە بۆ بەندی پێنجی هاوپەیمانێتی ناتۆ، کە تیایدا داوای بەرگری هاوبەشی هاوپەیمانێتیەکە دەکات لە هەر وڵاتێکی ئەندام لە هاوپەیمانێتیەکەدا.”

ئۆکرانیا ئەندام نیە لە هاوپەیمانێتی ناتۆدا بەڵام زیاتر لە 10 ساڵە داوایکردووە ببێتە ئەندام، ئەمەش ڕوسیای توڕە کردووە، ڕوسیا داوای کردووە هاوپەیمانێتی ناتۆ ڕێگە نەدات ئۆکرانیا ببێتە ئەندام تیایدا و چالاکییە سەربازییەکانی لە ناوەڕاست و ڕۆژهەڵاتی ئەوروپا کەم بکاتەوە.