سبەی دیداری یەکێتی لە گەرمیان ئەنجام دەدرێت

SNN

وا بڕیارە سبەی شەممە 2ی نیسان، دیداری یەکێتی لە گەرمیان ئەنجام بدرێت و لە راگەیەندراوێکدا، ھەموو دڵسۆزانی یەکێتی دەکات بەشداریەکی گەرموگوڕ بکەن لە داڕشتنەوەی بەرنامەی چاکسازی و نوێبونەوەی راستەقینە لە بوارە جیاجیاکاندا.

ئاماژە بەوەشکراوە، وەک چۆن ھەمیشە گەرمیان سەنگەری پێشەوەی بەرگری و سیمبوڵی قوربانی ئەنفال بووە، لە ئێستاشدا رۆڵێکی گرنگی لە ژیانی سیاسی یەکێتیەکەی خۆیان ھەیە، دیداری یەکێتی بانگەوازێكی هەڤاڵانە و نیشتمانییانەیە بۆ تاووتوێكردنی واقعی ئێستای یەكێتی و ناسنامەكەی، بۆ نوێكردنەوەی وتاری سیاسی و كۆمەڵایەتی و گەشەپێدانییەتی، بۆ ئەوەی‌ بە دیدگایەكی نوێوە ئامادەبێت ئەركەكانی سەرشانی جێبەجێ بكا و سەرەنجام باشتر خزمەتی كۆمەڵانی خەڵك و خاكی كوردستان بكات، بۆ سبەینێیەكی باشتر كوردستانێكی ئاوەدان بۆ هەمووان، بێ جیاوازی، فەراهەم بكات.

لەم چواچێوەیەدا دیداری یەكێتی، دەیەوێت چەندین تەوەری جێی بایەخی ئێستاو ئایندەی حزب و پێداویستی و كێشە و پێشهاتەكانی كۆمەڵگەكەمان، ئەزموونی سیاسی گەلەكەمان تاوتوێ بكات، چونكە پێشهات و گۆڕانكارییەكانی كۆمەڵگا و سەردەم لە ئاستی كوردستان و دەرەوەشدا ئەم هەوڵ و كۆششە تازەیە دەخوازێت، پێویستمان بەوەیە لەهەموو سێكتەرەكاندا، دیدی نوێ و دەسپێشخەری یەكێتییانە بێنینە كایەوە.