بەواژووی 68 پەرلەمانتار داوای یاسای ماف و ئیمتیازاتی پێشمەرگە دێرینەكان دەكرێت
هێزەکانی پێشمەرگە
SNN-عەلی حەمە سەعید
بەمەبەستی هێنانەكایەی یاسای ماف و ئیمیتیازاتی پێشمەرگە دێرینەكانی شۆڕشی ڕزگاریخوازی كورد بە واژووی 68 پەرلەمانتار پێشنیارە یاسای ماف و ئیمتیازاتی پێشمەرگە دێرینەكانی شۆڕشی بزووتنەوەی رزگاریخوازی كوردستان ئاڕاستەی دەستەی سەرۆكایەتی پەرلەمانی كوردستان كراوە، جێگری سەرۆكی لیژنەی كاروباری پێشمەرگە لەپەرلەمانی كوردستان ئاماژە بەوەدەكات بوونی ئەو یاسایە بە پێویست و هەنووكەیی دەزانین.
عوسمان سێدەری جێگری سەرۆكی لیژنەی كاروباری پێشمەرگە لە پەرلەمانی كوردستان بە SNNی ڕاگەیاند: پێشمەرگە دێرینەكانی شۆڕشی بزوتنەوەی رزگاریخوازی كوردستان وەك هەر چین و توێژێكی دیكەی كوردستان ئەوانیش بەشێكی گرنگی ئەم گەم گەلەن كە ڕۆڵی سەرەكی و بنەڕەتیان هەبووە لە فەراهەمكردنی ئەم ئازادییەی كە لە ئێستادا لەهەرێمی كوردستان بوونی هەیە، بەڵام تا ئێستا وەك پێویست ئاو لەو پێشمەرگە دێرینانە نەدراوەتەوە بۆیە لیژنەكەمان لە پەرلەمانی كوردستان هاوڕابووین كە دەبێت یاسایەكی تایبەت بەماف و ئیمتیازاتی پێشمەرگە دێرینەكان ئامادە بكەین و ڕاسدەستی دەستەی سەرۆكایەی پەرلەمانی بكەین.
ئاماژەی بەوەشكرد، بەگوێرەی بڕگەی پێنجەم لە ماددەی 78 ی پەیڕەوی ناوخۆی پەرلەمانی كوردستان و ژمارەی یاسایی ئەندامانی پەرلەمان وبە واژووی 68 پەرلەمانتار، پێشنیازە یاسای ماف و ئیمتیازاتی پێشمەرگە دێرینەكانی شۆڕشی بزووتنەوەی رزگاریخوازی كوردستانمان ئامادەكردووە و ڕادەستی دەستەی سەرۆكایەتی پەرلەمانیشمان كردووە بۆ ئەوەی لە داهاتوویەكی نزیكدا بخرێتە بەرنامەی كاری دانیشتنەكانی پەرلەمانی كوردستان.
جێگری سەرۆكی لیژنەی كاروباری پێشمەرگە لە پەرلەمانی كوردستان، ئەوەشی خستەڕوو، بوونی ئەو یاسایە بۆ پێشمەرگە دێینەكان پێویستییەكی گرنگ و هەنووكەیی بوو بۆ ڕێزگرتن لەو خەبات و قارەمانییەتیەی كە ئەو پێشمەرگە دێرینانە لەپێناو ڕزگاری گەلەكەمان كردوویانە، هاوكات هۆكارێكیش دەبێت بۆ شایستە بوون و شایستە نەبوونی ئەوانەی كە ڕۆژێك لە ڕۆژان پێشمەرگە نەبوون بەڵام وەك پێشمەرگەی دێرین ناویان تۆماركراوە.
