فهرمانبهرانى سەرۆكایەتی شارەوانی هەڵەبجە بایكۆتی دەوامیان راگەیاند
بینای سەرۆکایەی شارەوانی هەڵەبجە | فۆتۆ: SNN
SNN – عەلی حەمە سەعید
بههۆى دواكەوتنی مووچەكانییان و وەرنەگرتنی مووچەی مانگی شوبات ئەمڕۆ یهكشهممه 3ى نیسان، فەرمانبەرانی سەرۆكایەتی شارەوانی هەڵەبجە بایكۆتی دەوامیان راگەیاند و جەخت لەسهر ئهوەدەكەنەوە، “تاوهكو مووچەی مانگی شوبات و ئازار پێكەوە وەرنەگرن ناگەڕێنەوە سەركارەكانیان”.
سەلام مستەفا، فەرمانبەری شارەوانی هەڵەبجە بە SNNی راگەیاند: “بەهۆی ئەوەی تاوهكو ئێستا مووچەی مانگی شوباتمان وەرنەگرتووە، بۆیە ئەمڕۆ بڕیارماندا كە بایكۆتی دەوام بكەین”.
وتیشى: “سەرجەم فەرمانبەرانی سەرۆكایەتی شارەوانی هەڵەبجە بڕیارمانداوە تاوهكو ئەوكاتەی مووچەی مانگی شوبات و ئازار وەرنەگرین ناگەڕێینەوە سەر كارەكانمان، چونكە ناكرێت بەم جۆرە دەوامبكرێت و حكومەت یاری بە بژێوی فەرمانبەران و هاووڵاتییانەوە بكات”.
وتەكانی ئەو فەرمانبەرەی سەرۆكایەتی شارەوانی لەكاتێكایە كە ئەمڕۆ بەرپرسێكی باڵای وەزارەتی دارایی ئەوەی بە SNN راگەیاند، “پارەی پێویست لەبەردەستدا هەیە بۆ دابەشكردنی مووچە بەڵام سەرۆكی حكومەت فەرمان بە خەرجكردنی نادات”.
هاوكات نوێنهرى فهرمانبهرانى شارهوانى ههڵهبجه له كۆنگرهیهكى رۆژنامهوانیدا رایگهیاند، “ئهگهر دۆخى دابهشكردنى مووچه بهمشێوهیهى ئێستا بهردهوامبێت ئێمه ئامادهنین تاوهكو جهژنى قوربان بایكۆت بشكێنین و دهستبه دهوام بكهینهوه”.
