وەزارەتی بازرگانی: کۆنترۆڵی نرخی خۆراک دەکەين

SNN

وەزارەتی بازرگانی هەرێم رايگەياند: لەم مانگە پیرۆزە دا هەموو هەوڵێک دەدەین بۆ چاودێریکردنى بازاڕ و کۆنترۆڵکردنى نرخى خۆراک و پێداویستیەکانى هاووڵاتیان.

وەزارەتی بازرگانی و پيشەسازی هەرێم لە راگەيەندراوێکدا بڵاويکردەوە: هەرکەس و بازرگانێک سەرپێچى بکات رووبەڕووى سزاى یاسایی دەبێتەوە، بۆ ئەم مەبەستەش تیمەکانى چاودێرى بازرگانى سەر بە بەڕێوەبەرایەتى گشتى بازرگانى وەزارەتمان بەردەوامن لە گەڕان و بەدواداچوون لە سەرجەم شارو شارۆچکەکان.

ئاماژەی بەوەشکردووە: هاووڵاتیان ئاگادار دەکەین، هاوکارمان بن، لەکاتی بینینی هەر قۆرخکارى و دیاریدەیەکى نا ئاسایى لە مامەڵە کردن لە خۆراک و پێداویستیەکانى خەڵک و بوونی هەر کاڵایەکی بەسەرچوو تیمەکانمان ئاگاداربکەنەوە.

لە راگەيەندراوەکە ئەوەش هاتووە: بەپێویستی دەزانین، دڵنیایی بدەینە هاووڵاتیان کەوا خۆراک و کەل و پەلی بەشی پێداویستی خەڵک، لەکۆگاکاندا هەیە و بە هاوکاری بازرگانەکان دابینکراوە، هەروەها دابەشکردنی سەبەتەی خۆراکیش لەڕێگەیی بریکارەکانەوە بەردەوامە.