وردەكاری چارەسەركردنی ئەو منداڵانەی كەمدەرامەتن لەلایەن نوسینگەی قوباد تاڵەبانییەوە

 SNN-عەلی حەمە سەعید
بەمەبەستی هاوكاریكردنی ئەو خێزانانەی كە منداڵی نەخۆشیان هەیە و لەرووی مادییەوە توانای چارەسەركردنی نەخۆشی منداڵەكانیان نییە، نوسینگەی قوباد تاڵەبانی بە هێنانی تیمێكی تایبەت لە پزیشكانی پسپۆڕی گورچیلەو میزەڕۆ تێچووی نەشتەرگەری ئەو منداڵانە لە ئەسستۆ دەگرێت كە لەڕووی مادییەوە توانای ئەنجامدانی نەشتەرگەرییان نییەو پێویستیان بە ناردنەدەرەوەی وڵات هەیە.

بەگوێرەی بەدواداچوونەكانی SNN  لە چەند ڕۆژی داهاتوودا تیمێك لە پزیشكانی پسپۆڕ لە بواری گورچیلەو میزەڕۆ كە لە پزیشكی بیانی و ناوخۆیی پێكهاتوون، لە نەخۆشخانەی ئەنوەرشێخە دەستبەكار دەبن بۆ ئەنجامدانی ئەو نەشتەرگەرییە قورس و هەستیارانەی كە لە دەرەوەی ولات ئەنجام دەدرێن و تێچووی ئەو جۆرە نەشتەرگەریانەش زۆرە و لە توانای هەموو خێزانێكدا نییە ئەو بڕە پارەیە دابین بكات.

ئاماژە بەوەشكراوە، نوسینگەی قوباد تاڵەبانی جێگری سەرۆكی حكومەتی هەرێم ئامادەیی تەواویان دەربڕیوە كە تێچووی هەموو ئەو نەشتەرگەریانە بگرەنە ئەستۆ كە نەشتەرگەری ئاڵۆزن، بۆ ئەو مەبەستەش لە ڕۆژانی دوو شەممان و چوار شەممان ناوی ئەو منداڵانە تۆماردەكرێت كە پێویستیان بە ئەنجامدانی نەشتەرگەری هەیە بۆ ئەوەی لەگەڵ گەیشتنی تیمە پزیشكییە پسپۆڕەكە نەشتەرگەرییەكانیان بۆ ئەنجام بدەن.

هەر لە بەدواداچوونەكانی SNN ئەوەشی خراوەتەڕوو، لەسەرەتادا لەلایەن تیمێكی پزیشكی ناو نەخۆشخانەی ئەنوەرشێخە جۆری نەخۆشەكان و پێویستی بە ئەنجامدانی نەشتەرگەری دیاری دەكرێن ئاخۆ لە جۆری نەشتەرگەری ئاڵۆزە یاخود نەشتەرگەری سادەیە، بۆیە ئەم پرۆژەیە بەردەوامی دەبێت تا ئەوكاتەی زۆرترین منداڵ نەشتەرگەری ئەنجام دەدەن و نەبرێنە دەرەوەی وڵات بۆ ئەنجامدانی نەشتەرگەرییەكانیان.