بۆ دەستبەسەرداگرتنی ئەم جۆرە ئۆتۆمبێلانە هاتووچۆی پارێزگایەكی هەرێم یەك هەفتە مۆڵەت دەدات
SNN-عەلی حەمە سەعید
بەڕێوەبەرایەتی هاتووچۆی پارێزگای هەڵەبجە ماوەی یەك هەفتە مۆڵەت دەداتە سەرجەم هاووڵاتیان و پێشانگاكانی ئۆتۆمبێل و سكرابچییەكان بۆ دەستبەسەرداگرتنی ئەو ئۆتۆمبێلە لەكاركەوتوانەی كە بۆ ماوەیەكی زۆرە لەسەر شەقام و شۆستەكان دانراون گرفتیان بەگشتی بۆهاتووچۆ دروستكردوە.
لە ڕاگەیەندراوێكی بەڕێوەبەرایەتی هاتوچۆی پارێزگای هەڵەبجە كە وێنەیەكیان بۆ SNN ناردووە ئەوەخراوەتەڕوو، ئاگاداری سەرجەم هاووڵاتیان و پێشانگاكانی ئۆتۆمبێل و سیكرابچی لەسنوری ناوەندی هەڵەبجە دەكەینەوە كە لەماوەی یەك هەفتەدا تەواوی ئەو ئۆتۆمبێلە لەكاركەوتوانەی كە بۆ ماوەیەكی زۆرە لەسەر شەقام و شۆستەكان دانراون گرفتیان بەگشتی بۆهاتووچۆ دروستكردوە لاببهن.
ئاماژە بەوەشكراوە، ئەگەر لەماوەی یەك هەفتەدا ئەو جۆرە ئۆتۆمبیلانە لانەبرێن ئەوا ناچارین بەپێی یاسا سەرجەمیان بگوازینەوە و دەستیان بەسەردا بگرین.
ئاگادارییەكەی بەڕێوەبەرایەتی هاتووچۆی پارێزگای هەڵەبجە لەكاتێكدایە كە ماوەیەكی زۆرە لە زۆرێك لە شەقام و كۆلانە سەرەكییەكانی هەڵەبجە ژمارەیەك ئۆتۆمبیلی جۆراوجۆر دانراوە كە لەكار كەوتوون و ئاستەنگی هاتووچۆیان بۆ هاووڵاتیان دروستكردوو لەگەڵ ئەوەشدا سیمایەكی ناشیرینیان بەو گەڕەك و كۆڵانانەداوە.
