“پەیوەندی هەرێم و بەغدا بە رێککەوتنی پینەوپەڕۆ بەڕێوەناچێت”

SNN-عەلی حەمە سەعید
لەگەڵ ئەوەی لەهەندێك دەزگا ڕاگەیاندنەكانی پارتییەوە باس لە رێككەوتنی نێوان هەولێرو بەغدا دەكرێت لەسەر پشكی هەرێم لە پرۆژە یاسای بودجە و هەروەها ڕێككەوتن لەسەر پرۆژەیاسای نەوت و گاز، بەڵام پەرلەمانتارانی كورد لە بەغدا ئاماژە بەوەدەكەن تا ئێستا هیچ زانیارییەك لەسەر وردەكاری ڕێككەوتنەكان بۆ ڕای گشتی بڵاو نەكراونەتەوە و وازهێنان لە %14ی پشكی هەرێم و كەمكردنەوەی بۆ لە %12 سازشكردنە لەسەر مافەكانی كورد.

سۆزان مەنسور، ئەندامی ئەنجومەنی نوێنەرانی عێراق لە فراكسیۆنی یەكێتی بە SNNی ڕاگەیاند: تا ئێستا هیچ زانیارییەك بە پەرلەمانتارانی كورد نەدراوە لەسەر وردەكاری سەردان و دانیشتن و كۆبوونەوەكانی ئەو شاندەی بەناوی حكومەتی هەرێمەوە هاتوونەتە بەغدا و لەگەڵ لایەنی عێراقی دەستیان بە گفتوگۆكردووە، هەروەها تا ئێستا هیچ زانیارییەك نییە لەسەر ئەوەی ڕێككەوتنی كۆنكرێتی لە نێوان هەرێم و بەغدا كرابێت.

ئاماژەی بەوەشكرد، هەروەك سەرۆك (بافڵ جەلال تاڵەبانی) داوایكردووە دەبێت كێشەو گرفتەكانی نیوان هەولێرو بەغدا چارەسەری ڕیشەییان بۆ بدۆزرێتەوە و ناكرێت بە پینەوپەڕۆ بەناوی ڕێككەوتنەوە نێوان هەرێم و بەغدا بەم شێوەیە بمێنێتەوە، بۆیە كەمكردنەوەی پشكی لە %14 لە بودجەی گشتی بۆ لە %12.67 ئەمە سازشكردنە لەسەر مافەكانی كورد و نەدەبوو پشكی هەرێم كەمبكرێتەوە.

ئەو ئەندامەی ئەنجومەنی نوێنەرانی عێراق ئەوەشی خستەڕوو، هەر ڕێككەوتنێك لە نێوان هەرێم بەغدا كە دەكرێت گرنگ لە جێبەجێكردنی ئەو ڕێككەوتنە و پابەند بوونی هەردوولایە بە ناوەڕۆكی ڕێككەوتنەكەوە، چونكە ساڵانی ڕابردووش زۆر ڕێككەوتنی باش لەنێوان هەرێم و بەغدا واژۆكراون بەڵام دواجار جێبەجێنەكراون.