لەتیف نێروەیی: راگەیەنراوەكەی سەرۆك بافڵ نەخشەڕێگەیە بۆ مسۆگەرکردنی شایستە داراییەكان
SNN
ئەندامێکی سەرکردایەتی یەکێتی رايگەياند: راگەیەنراوەكەی سەرۆك بافڵ نەخشەڕێگەیەكە بۆ كۆتاییهێنان بە ئاڵۆزییەكانی نێوان هەولێر و بەغدا و مسۆگەرکردنی ماف و شایستە داراییەكانی هاووڵاتیانی هەرێم.
لەتیف نێروەیی، ئەندامی سەركردایەتی یەكێتیی نیشتمانیی كوردستان، لە میانی دیدارێکی رۆژنامەوانی رایگەیاند: چارەسەری كێشەكانی نێوان هەرێمی كوردستان و حكومەتی بەغدا، دەستوورە. بە گەڕانەوە بۆ دەستووری عێراق، بەشێكی گەورەی ئەو كێشانە چارەسەر دەبێت. لە راگەیەنراوەكەی سەرۆك بافڵ جەلال تاڵەبانی سەرۆكی یەكێتیی نیشتمانی كوردستاندا، تەئكید لەو خاڵە كراوەتەوە.
نێروەیی باسی لەوەشكرد: كە راگەیەنراوەكەی سەرۆك بافڵ جەلال تاڵەبانی، وەك نەخشەڕێگەیەكە بۆ كۆتاییهاتن بە گرژی و ئاڵۆزییەكانی نێوان هەولێر و بەغدا لەلایەك و مسۆگەربوونی ماف و شایستە داراییەكانی هاووڵاتیانی هەرێم لەلایەكی ترەوە.
ئاشكراشیكرد: ئامانجی یەكێتیی نیشتمانیی كوردستان، بریتییە لەوەی هاووڵاتیانی هەرێم هاوشێوەی ناوچەكانی تری عیراق لە داهاتی نەوت سوودمەند بن و لە كاتی خۆیدا شایستە داراییەكانیان و مووچە وەربگرن.
