وادەكەی سەرۆكی هەرێم بۆ هەڵبژاردن شەش مانگی ماوە و یەكێتیش ئامادەی هەڵبژاردنە

SNN-عەلی حەمە سەعید

 ئەمڕۆ شەش مانگی تەواو دەمێنێتەوە بۆ  ئەو وادەیەی كە لەلایەن سەرۆكی هەرێمەوە بۆ ئەنجامدانی هەڵبژاردن دیاریكرابوو، هاوكات كۆمیسیۆنیش داوای شەش مانگی كردبوو بۆ ئامادەكاری ئەنجامدانی هەلبژاردن، بەڵام تا ئێستا هیچ ڕێككەوتنێكی كۆتایی لە نێ,ان یەكێتی و پارتی بۆ ئەنجامدانی هەڵبژاردن واژۆنەكراوە و كۆمیسیۆنیش كارانە نەكراوەتەوە، جێگری سەرۆكی فراكسیۆنی یەكێتی لە پەرلەمانی كوردستانیش جەخت لەوەدەكاتەوە یەكێتی ئامادەی هەڵبژاردنە.

لوقمان وەردی، جێگری سەرۆكی فراكسیۆنی یەكێتی لە پەرلەمانی كوردستان بە SNNی ڕاگەیاند: ئێمە لە فراكسیۆنی یەكێتی هەردەم ئامادەبووین بۆ ئەنجامدانی هەڵبژاردن لەهەر وادەیەكدا بێت بەڵام بەومەرجەی یاسای هەڵبژاردن هەموار بكرێتەوە و بابەتی كورسی كۆتاكانیش ڕێككەوتنی لەبارەوە بكرێت، لەهەموو كۆبوونەوەكانیش ئامادەیی خۆمانمان بۆ ئەنجامدانی هەڵبژاردن دەربڕیوە و نەمانویستووە ببین بەشێك لە گرفتەكانی بەردەم هەڵبژاردن.

ئاماژەی بەوەشكرد، لە ڕۆژانی داهاتوو دەزگای هەڵبژاردنی یەكێتی و پارتی جارێکی دیكە دەستدەكەینەوە بە كۆبوونەوەكانمان بۆ ئەوەی بگەینە ڕێككەوتنی كۆتایی لەبارەی پرسی هەڵبژاردن لە ناویاندا بابەتی هەمواری یاسای هەڵبژاردن و كاراكردنەوەی كۆمیسیۆن و هەروەها كورسی كۆتاكان بۆ ئەومەبەستەش ئێمە پێشنیاری خۆمانمان داوەتە لایەنی پارتی و هاوكات نەتەوەیەكگرتووەكانیش پێشنیاری خۆیانیان هەبووە لەبارەی كورسی كۆتان بۆیە دەبێـت دواجار بگەینە ڕێككەوتن.

بەگوێرەی ئەو زانیارییانەی كە لە بەرپرسێكی كۆمیسیۆن بە SNNدراون ئەوەخراوەتەڕوو، ئەو وادەیەی لەلایەن سەرۆكی هەرێم دیاریكرابوو كە 18/11/2023 بەدڵنیاییەوە هەڵبژاردنی تیادا ئەنجام نادرێت، چونكە ئێمە بەلایینی كەم پێویستیمان بە شەش مانگ دەبێت بۆ ئامادەكاری، بەڵام تا ئێستا لە پەرلەمان كۆمیسیۆن كارا نەكراوەتەوە هەروەها یەكێتی و پارتی نەگەیشتوونەتە ڕێككەوتن یاسای هەڵبژاردنەكان هەموار نەكراوەتەوە بودجە بۆ ئەنجامدانی هەڵبژادن دیاری نەكراوە، هەموو ئەمانە پێویستیان بە كاتە بۆیە پێدەچێت ئەنجامدانی هەڵبژاردن بكەوێتە سەرەتای ساڵی داهاتوو ئەگەر یەكێتی و پارتی بەتەواوی ڕێكبكەون.