وەزیرەکەی سەدر وەڵامی ئەو دەنگۆیانە دەداتەوە کە ئاراستەیان کراون

SNN

محەمەد ساڵح عێراقی، ناسراو بە “وەزیرەکەی موقتەدا سەدر” لە نوێترین لێدوانیدا لە تۆڕی کۆمەڵایەتی x, وەڵامی ئەو دەنگۆیانە دەداتەوە کە دەڵێن ‌هێرشەکانی دوێنێی سەر باڵیۆزخانەی ئەمریکا لەلایەن لایەنگرانی سەدرەوە ئەنجامدراوە و ئاماژە بەوە دەکات ئەو تۆمەتانە سەرجەمیان “جەنگێکی هەڵبژاردنی گەندەڵانەیە” کە دژمان ئەنجام دەدرێت.

راشیگەیاند، پاراستنی باڵیۆزخانە لە چوارچێوەی ئەرکەکانی حکومەتدایە، ئەگەر حکومەت بوونی هەبێت، ئەگەر لایەنگرانی سەدریش ئەو کارەیان کردبێت و هێرشیان کردبێتە سەر باڵیۆزخانە خۆشەویستەکاندا شەرەفێکی گەورەیە بۆمان، ئەمەی کە رووشی داوە تەنیا جەنگێکی هەڵبژاردنە لە نێوان کۆمەڵێک گەندەڵدا.

بەیانی رۆژی دوێنی هەینی بە 7 مووشەک باڵیۆزخانەی ئەمریکا لە بەغدا کرایە ئامانج، هێرشەکەش بە یەکێک لە گەورەترین هێرشەکان دانرا لە ساڵانی رابردوودا کە باڵەخانەی باڵیۆزخانەی ئەمریکای کردۆتە ئامانج.