“یەکێتی دەیەوێت دابەشکردنی مووچە چیتر دوانەکەوێت و هەڵبژاردنیش لە کاتی خۆیدا بکرێت”

SNN-عەلی حەمە سەعید

لێپرسراوی بۆردی ڕاگەیاندنی یەكێتی نشتیمانی كوردستان ئاماژە بەوەدەكات، بەهۆی دواكەوتنی هەڵبژاردنەوە زۆرێك لە دامەزراوە شەرعییەكانی هەرێمی كوردستان پەكیان كەوتووە و باری ژیان و گوزەرانی هاووڵاتیانیش ڕووبەڕووی بارودۆخێكی سەخت بووەتەوە، بۆیە هەمووكات یەكێتی ئامادەبووە بۆ ئەنجامدانی هەڵبژاردن و ئەنجام نەدانی هەڵبژاردنیش پرۆسەی دیموكراسی هێندەی دیكەدەخاتە مەترسییەوە.

لەتیف نێروەیی، لێپرسراوی بۆردی راگەیاندی یەكێتی نیشتمانی كوردستان بە SNNی رایگەیاند: لە ئێستادا هەرێمی كوردستان لە دۆخێكی ئاڵۆزدایە كە بەهۆی دواكەوتنی هەڵبژاردنەوە  پەرلەمانی كوردستان پەك خراوە و كۆمسیۆن شەرعێتی نەماوە و ناكۆكی زۆر لەنێوان هێز و لایەنە سیاسییەكانیش بوونی هەیە، هاوكات بابەتی دواكەوتنی مووچەی فەرمانبەران هێندەی دیكە دۆخەكەی ئاڵۆزتركردووە و باروگوزەرانی هاووڵاتیانی سەختتركردووە كە یەكێتیی نیشتمانی كوردستان هەمەیشە پێداگری كردووە هەڵبژاردن لە كاتی خۆیدا بكرێت و مووچەی فەرمانبەرانیش لە كاتی خۆیدا دابەشبكرێت.

ئاماژەی بەوەشكرد، ئەگەر لەم قۆناغەدا هەڵبژاردن دوابخرێت ئەوا دیموكراسی لە هەرێمی كوردستان لە پاشەكشەدا دەبێت و مەترسی لە سەر قەوارەی هەرێمی كوردستان دروست دەبێت و دام و دەزگاكان زیاتر بێ شەرعییەت دەبن، بۆیە تەنها بە ئەنجامدانی هەڵبژاردن دەتوانیین شەرعیەت بگێڕینەوە بۆ دامەزراوەكان، لە ئێستادا لە ناوخۆی هەرێمەوە هەوڵدەدرێت هەڵبژاردن نەكرێت و دوابخرێت.

لێپرسراوی بۆردی راگەیاندی یەكێتی نیشتمانی كوردستان، ئەوەشی خستەڕوو، نەتەوە یەكگرتووەكان و وڵاتانی هاوپەیمان نیگەرانن لە دواخستنی هەڵبژاردن و ئەم نیگەرانیانەش جدین و مەترسین بۆسەر قەوارەی هەرێمی كوردستان بۆیە یەكێتی مەبەستییەتی دابەشكردنی مووچە لەوەزیاتر دوانەخرێت و هیچ هەوڵێكیش نەدرێت بۆ دواخستنی هەڵبژاردن چونكە هیچیان لەبەرژەوەندی هەریمی كوردستان نابن.