ئاماری کوژراوانی هێرشەکەی کونسوڵخانەی ئێران بەرزبووەوە

SNN

ئاماری کوژراوانی ھێرشەکەی رۆژی دووشەممەی ئیسرائیل بۆ سەر کۆنسوڵخانەی ئێران لە دیمەشق  بەرزبووەوە و ژمارەی کوژراوان گەیشتە 16 کەس.

ئەمڕۆ پێنجشەممە 4ی نیسان، روانگەی سوری بۆ مافەکانی مرۆڤ رایگەیاند، ژمارەی ئەو کەسانەی بەھۆی ھێرشەکەی ئیسرائیل بۆ سەر کۆنسوڵخانەی ئێران لە دیمەشق کوژران بۆ 16 کەس بەرزبووەوە، بە جۆرێک 8 کەسیان ئێرانین و 5 کەسیان سورین و یەکێک لە کوژراوەکان لوبنانییە، دوو کەسی دیکەش بەھۆی بۆردومانەکەوە کوژراون کە کوڕ و دایکێکی مەدەنین و لە نھۆمی چوارەمی ئەو بینایەدا ژیاون کە بارەگای کۆنسوڵخانەی ئێرانی تێدابووە.

ئەمە لە کاتێدایە،1ی نیسان ئیسرائیل ھێرشێکی ئاسمانی کردە سەر کونسوڵخانەی ئێران لە دیمەشقی پایتەختی سوریا، بەهۆیەوە 16 کەس کوژران کە یەکێکیان سەرکردەیەیکی دیاری ئێرانە، ئەویش محەمەد ڕەزا زاھیدی فەرماندەی فەیلەقی قودسی سەر بە سوپای پاسدارانی ئێران بووە لە سوریا و لوبنان.

دوابەدوای هێرشەکەی ئیسرائیل بۆ سەر کونسولخانەی ئێران، حکومەتی ئیسلامی ئێران بەڵێنی وەڵامدانەوەیدا و ھەڕەشەی توندی ئاڕاستەی ئیسرائیل و ئەمریکا کرد.