بێگەرد تاڵەبانی: رێگەمان نەداوە یەک دەنک گەنم لە دەرەوە هاوردەی هەرێمی کوردستان بکرێت

SNN-
وەزیری کشتوکاڵی هەرێم رایگەیاند، رێگەیان نەداوە یەک دەنک گەنم لە دەرەوە هاوردەی هەرێمی کوردستان بکرێت، دەشڵێت:”دەبێت عێراق گەنمی جوتیارانی هەرێم بێ جیاوازی وەربگرێت و لەمەودوا قبوڵی ناکەین گەنمی جوتیاران بە رێژە وەربگیرێت”

بێگەرد تاڵەبانی وەزیری کشتوکاڵ و سەرچاوە ئاوییەکانی حکومەتی هەرێم لە کۆنگرەیەکی رۆژنامەوانیدا رایگەیاند، لەگەڵ بەرپرسانی عێراق کۆدەبنەوە و لەمەودوا قبوڵی ناکەن گەنمی جوتیاران بە رێژە وەربگیرێت، دەبێت هاوشێوەی جوتیارانی پارێزگاکانی دیکەی عێراق مامەڵە لەگەڵ جوتیارانی هەرێمی کوردستان بکرێت و تەواوی گەنمەکەیان لێوەربگیرێت و رێگەشیان نەداوە تا ئێستا یەک دەنک گەنم لە دەرەوەی وڵات داخڵی هەرێمی کوردستان ببێت.

وەزیری کشتوکاڵ ئاماژەی بەوەشکرد، سیاسەتێک پەیڕەو دەکرێت و زوڵم لە جوتیارانی هەرێمی کوردستان دەکرێت، بڕێکی دیاریکراو گەنمیان لێوەردەگرن، دواتر ئەو بڕە دەمێنێتەوە لە بازاڕی ڕەش بە نرخێکی کەمتر لێیان دەکڕدرێتەوە و گەنمەکەیان پێ هەڕاج دەکەن، بۆیە لە کۆبونەوەی لەگەڵ وەزارەتی کشتوکاڵی عێراق داوا دەکەن چیتر بۆ وەرگرتنی گەنم رێژە بۆ جوتیارانی هەرێم دیاری نەکرێت و تەواوی گەنمەکەیان لێوەربگیرێت.

راشیگەیاند، بۆ ئەمساڵ بەرهەمی گەنم لە ئاستێکی باشدایە و کوالێتییەکەشی زۆر باشە، نرخەکەشی هەمان ئەو نرخە دەبێت کە حکومەتی عێراق دیاریکردوە بۆ هەر تۆنێک 850 هەزار دینارە.