ئەمڕۆ مووچەی ئەم شوێنانە دابەشدەکرێت

SNN

وەزارەتی دارایی و ئابوری هەرێم، رایگەیاندبوو، ئەمڕۆ مووچەی مانگی چواری ئەو شوێنانە دابەشدەکرێت کە لە بەغداوە تەمویلەکانیان گەیشتووە.

وەزارەتی دارایی و ئابوری هەرێم رایگەیاندبوو، “نیوەڕۆی ڕۆژی سێشەممە 14ی ئایاری 2024، نزیکەی 168 ملیار دینار بە سێ گوژمە وەک شایستەی مووچەی مانگی نیسانی (خانەنشینانی مەدەنی و سەربازی و کەسوکاری شەهیدان و ئەنفالکراوان و خاوەن پێداویستییە تایبەتەکان)ی هەرێمی کوردستان لەلایەن وەزارەتی دارایی حکومەتی فیدراڵەوە خرایە سەر هەژماری بانکی وەزارەتی دارایی و ئابوری هەرێمی کوردستان لە لقی هەولێری بانکی ناوەندی عێراق.”

ئاماژە بەوەکراوە، “ئەمڕۆ جوارشەممە 15ی ئایار، دەست بەدابەشکردنی مووچەی مانگی نیسان دەکرێت و مووچەی ئەو چین و توێژانە دابەش دەکرێت کە لە بەغداوە تەمویلەکانیان گەیشتووە”.

هاوکات، دوێنێ سێشەممە شاندی هەرێمی کوردستان بە سەرۆکایەتی ئاوات شێخ جەناب وەزیری دارایی گەیشتە بەغدا، بەگوێرەی زانیارییەکانی وەزارەتی دارایی، ئامانج لەسەردانەکە گفتوگۆکردنە لە سەر هەمواری خشتەکانی یاسای بودجەو چارەسەرکردنی ئەو گرفت و ئاستەنگانەی لە کاتی هەمواری یاساکە بۆ پشکی هەرێمی کوردستان دروست دەبێت.