پێنج کەس بە تای خوێنبەربوون لە عێراق گیانیان لەدەستداوە

SNN

تاى خوێنبەربوون لە عێراق بڵاوبووەتەوە و 40 حاڵەتى تووشبوون و پێنج حاڵەتى گیان لەدەستدان لە پارێزگاکانى بەغدا و چەند پارێزگایەکى دیکە تۆمار کراوە.

وەزارەتى کشتوکاڵى عێراق ڕایگەیاند، بە مەبەستی ڕێگریکردن لە تەشەنەسەندنی زیاتری نەخۆشییەکە لە 15ى نیسانەوە بە بەشدارى 246 تیم هەڵمەتێکى دەرمانڕشتنى لە کێڵگەکانى بەخێوکردنى ئاژەڵ لە 15 پارێزگا دەستپێکردووە، بە تایبەت لە پارێزگاى زیقار کە زۆرترین حاڵەتەکانى تاى خوێنبەربوونى تێدا تۆمارکراوە.

بە گوێرەى ئامارەکانى وەزارەتى کشتوکاڵ، لە ئەمساڵدا 40 حاڵەتى تووشبوون و پێنج حاڵەتى گیان لەدەستدان بە تای خوێنبەربوون لە پارێزگاکانى بەغدا، نەینەوا، زیقار و بابل تۆمارکراوە.

ئەمەش لە کاتێکدایە، ساڵى ڕابردوو 545 حاڵەتى تووشبوون و 70 حاڵەتى گیان لەدەستدان هەبووە.