“دەتوانین یارمەتی عێراقییەکان بدەین ببنە خاوەنی کارەبای 24 کاتژمێری”

SNN

ئەمڕۆ چوارشەممە، 15ی ئایار، جێفری پیات، یاریدەدەری وەزیری دەرەوەی ئەمەریکا بۆ فەرمانگەی سەرچاوەکانی وزە گەیشتە بەغدا.

ئەلینا رۆمانۆوسکی، باڵیۆزی ئەمەریکا لە عێراق، لە تۆڕی کۆمەڵایەتیی X وێنەیەکی خۆی لەگەڵ ناوبراو بڵاو کردووەتەوە، خۆشحاڵیی خۆی بە سەردانەکە دەربڕیوە و دەڵێت، ئامانجی هاتنی بەرپرسە ئەمەریکییەکە “بەدواداچوونە بۆ دۆسیەی سەردانەکەی محەمەد شیاع سوودانی، سەرۆکوەزیرانی عێراق بۆ واشنتۆن”.

ساڵی 2021، مستەفا کازمی، سەرۆکوەزیرانی پێشووی عێراق ڕایگەیاند، 81 ملیار دۆلاریان بۆ کەرتی کارەبا تەرخانکراوە، بەڵام گەندەڵی ئاستەنگی گەورە بووە لەوەی کارەبا بە شێوەیەکی سەقامگیری بۆ هاووڵاتییان دابین بکرێت.

ئەلینا رۆمانۆوسکی لە بەشێکی دیکەی پەیامەکەیدا ئەوەی خستووەتەڕوو، “بەیەکەوە دەتوانین یارمەتی عێراقییەکان بدەین لە بواری گەشەسەندن لە ڕێگەی دابینکردنی کارەبای 24 کاتژمێری بە درێژایی هەفتە”.