ئەمساڵ زۆرترین قوربانی لە پارێزگای سلێمانی ئەنجامدراوە و بەراورد بە ساڵی ڕابردووش ڕێژەكە كەمیكردووە
SNN-عەلی حەمە سەعید
بەڕێوەبەری گوشتارگەی هاوچەرخی سلێمانی ئاماژە بەوەدەكات لە چوار ڕۆژی جەژنی قوربانی ئەمساڵ 996 سەر ئاژەڵی گەورە و بچوك لە كوشتارگەی سلێمانی بەمەبەستی قوربانیكردن سەر بڕدراون كە زۆربەیان ئاژەڵی بچوك بوون، هاوكات لەسەر ئاستی هەرێمی كوردستانیش زۆرترین قوربانی لە سلێمانی ئەنجامدراوە.
د. شاڵاو عارف، بەڕێوەبەری كوشتارگەی هاوچەرخی سلێمانی بە SNNێ ڕاگەیاند: بەگوێرەی دواین ئامار كە لە چوار ڕۆژی جەژنی قوربانی ئەمساڵ تۆمارمانكردووە 996 سەر ئاژەڵ بەمەبەستی قوربانیكردن لە كوشتارگەی سلێمانی سەڕبڕدراون و گۆشتەكەیان ڕادەستی خاوەنەكانیان كراوەتەوە، هاوكات لاشەی 27 سەر ئاژەڵ ڕەتكراونەتەوە كە گۆشتەكەیان شیاو نەبووە بۆ خواردن.
ئاماژەی بەوەشكرد، لە كۆی ئەو 996 سەر ئاژەڵەی كە لە ماوەی چوار ڕۆژی جەژن كراونەتە قوربانی، 864 سەر ئاژەڵیان ئاژەڵ بچووك بوون و 84 سەر ئاژەڵیشیان ئاژەڵی گەورە بوون، هاوكات بەراورد بە ساڵی ڕابردوو ڕێژەی قوربانیكردن كەمیكردووە ئەوەش بەهۆی ئەوەی لەمساڵدا نرخی ئاژەڵ گرانتربوو بەراورد بە ساڵی ڕابردوو.
بە گوێرەی بەدواداچوونەكانی SNNلەسەر ئاستی پارێزگاكانی هەرێم ئەمساڵ زۆرترین قوربانیكردن لە پارێزگای سلێمانی كراوە كە ژمارەكەی 996 سەر ئاژەڵ بووە پاشان پارێزگای هەولێر 828 سەر ئاژەڵ و لە پارێزگای هەڵەبجە489 ئاژەڵ و لە پارێزگای دهۆكیش 210 سەر ئاژەڵ كراونەتە قوربانی.
