“هیچ خوێندکارێکی زانکۆ بە دەرنەچوو هەژمار ناکرێت”
SNN
وەزارەتی خوێندنی باڵا و توێژینەوەی زانستی عێراق رایگەیاندووە، گۆڕانکاریی لە سیستمی ساڵانەی خوێندکاران دەکەن، هاوکات بۆ خوێندنی ئەمساڵیش هیچ خوێندکارێکی زانکۆ بە دەرنەچوو هەژمار ناکرێت.
ئەمڕۆ چوارشەممە 17ی تەمموز، وەزارەتی خوێندنی باڵا و توێژینەوەی زانستیی حکومەتی عێراق رایگەیاند، بۆ بەرژەوەندیی خوێندکاران و بەردەوامیدان بە پڕۆسەی خوێندن، هەستاین بە گۆڕانکاری لە سیستمی ساڵانەی خوێندکاران.
نەعیم عەبودی، وەزیری خوێندنی باڵا بڕیاریدا بۆ ساڵی خوێندنی 2023-2024، هیچ خوێندکارێکی زانكۆ بە دەرنەچوو هەژمار نەكرێت، واتە ئەمساڵ (كەوتوو و دەرنەچوو) نییە و هەموو خوێندکاران بە دەرچوو دادەنرێن.
بەگوێرەی راگەیەنراوەکە، بڕیارەكە سەرجەم خوێندکارانی زانكۆ لە خوێندنی بەیانیان و ئێواران بۆ هەردوو خولی تاقیكردنەوەكانی یەكەم و دووەم لە سەرجەم زانكۆ حكومی و ناحكومییەكان دەگرێتەوە.
