بە فەرمانێكی وەزارەتی دارایی هەرێم دابەشكردنی دوو مووچەی یەكەی 80 كرا بە یەك مووچە
پارەی عێراقی
SNN-عەلی حەمە سەعید
هەرچەندە تا كاتژمێر 11ی پێش نیوەڕۆی ئەمڕۆ دابەشكردنی مووچەی یەكەی 80ی هێزەكانی پێشمەرگە بە دوو مووچە دابەشكراوە، بەڵام هەر ئەمڕۆ وەزارەتی دارایی هەرێم بانكی بەحركەیان لە سنوری پارێزگای هەولێر ئاگاداركردووەتەوە كە تەنها یەك مووچە دابەش بكەن بە بێ ئەوەی هیچ ڕوونكردنەوەیەك بدەن.
بەگوێرەی ئەو زانیارییانەی كە دەست SNNكەوتووە ئەوەخراوەتەڕوو، ئەمڕۆ لەگەڵ دەستپێكردنەوەی دەوام لە بانكی بەحركە دەستكراوە بە دابەشكردنی مووچەی دوومانگی هێزەكانی یەكەی 80ی پێشمەرگە، هاوكات تا كاتژمێر 11ی پێش نیوەڕۆ هەر پێشمەرگەیەك لە بانكی بەحركە مووچەی وەرگرتبێت دوو مووچەی مانگی پێنج و شەشی وەرگرتووە.
ئاماژەی بەوەشكرد، لە دوای كاتژمێر 11 و 30 خولەك لەلایەن وەزارەتی دارایی و ئابوری حكومەتی هەرێم پەیوەندی بە بانكی بەحرەكەوە دەكرێت كە دەبێت تەنها یەك مووچە دابەشبكریت و مووچەی مانگی پێنج بدەنە پێشمەرگە و ئەفسەرانی هێزەكانی یەكەی 80ی هێزی پێشمەرگە.
هەر لە زانیارییەكانی SNNئەوەشهاتووە وەزارەتی دارایی و ئابوری هیچ ڕوونكردنەوەیەكی نەداوە لەبارەی ڕاگرتنی مووچەیەكی هێزەكانی یەكەی 80 و پێدانی تەنها یەك مووچە، ئەوەش نیگەرانی ئەو پیشمەرگە و ئەفسەرانەی لێكەوتووەتەوە كە لەو بانكە مووچە وەردەگرن و تا ئێستاش گرفتەكە چارەسەر نەكراوە.
