بەهۆی خواستی زۆری هاووڵاتیانی ناوەڕاست و باشووری عێراق، نرخی یەکەی نیشتەجێبوون لە هەرێم بەرزدەبێتەوە

SNN

بەهۆی بەرزی نرخی یەکەکانی نیشتەجێبوون بەتایبەتی لە شوقە و ڤێلا و ستییەکان، هاووڵاتیانی هەرێم تا رادەیەکەکی کەم دەتوانن سود لەم یەکانە وەربگرن و بیکڕن، بەپێچەوانەوە کە خواستێکی زۆری هاووڵاتیانی ناوەراست و باشووری عێراقی لەسەرە.

فەرمان حسێن، شارەزای بواری ئابووری و نیشتەجێبوون، ئەوەی بە میدیا عێراقییەکان راگەیاند: لە ساڵانی رابردوودا، خواستێکی زۆری هاووڵاتیانی ناوخۆی هەرێم هەبوو، لەسەر یەکە نیشتەجێبوونەکان، بەڵام خراپی دۆخی ئابووری لەکاتی ئێستادا وایکردووە کە هاووڵاتیانی هەرێم بەتایبەتی ئەوانەی کە خاوەن داهاتێکی مامناوەند و فەرمانبەری ئاساین، نەتوانن لە شوقە یاخود ڤێلاکانی یەکەی نیشتەجێبوونەکان سودمەندبن.

فەرمان ئاماژەی بەوەشکرد، لەکاتی ئێستادا نرخی یەکەکانی نیشتەجێبوون لە سەرجەم پارێزگاکانی هەرێم هەر لە بەرزیدا ماوەتەوە، بەجۆرێک کە فەرمانبەری ئاسایی ناتوانن لەم یەکانە سودمەندبن یاخود بیکڕن، هۆکاری ئەوەش دەگەڕێتەوە بۆ ئەوەی کە لەلایەن هاووڵاتیانی ناوەڕاست و باشووری عێراق خواستێکی زۆر هەیە بۆ کڕینی یەکەکانی نیشتەجێبوون بە تایبەتی لە ستییەکان.

شارەزایانی بواری ئابووی پێشتر ئاماژەیان بەوەکردووە، بەهۆی گۆڕانکاری کەشوهەواو خراپی دۆخی ژیان و خزمەتگوزاری لە ناوەڕاست و باشووری عێراق وایکردووە ئەو هاووڵاتیانەی کە خاوەن داهاتی بەرز و تەنانەت مامناوەندیشن روویان لە هەرێمی کوردستان بکەن، بەشێکی زۆریان یەکەی نێشتەجێبوونەکانیان لە ناوەڕاست و باشووری فرۆشتووە و هاتوون لە سیتییەکانی هەرێم نیشتەجێ بوون، ئەمەش وایکردووە کە بەردەوام نرخی یەکەی نیشتەجێبوون لە هەرێم لە بەرزبوونەوەدابێت.