وەزیری دەرەوەی ئێران ئەمڕۆ سەردانی عێراق دەکات

SNN

وتەبێژی وەزارەتی دەرەوەی ئێران رایگەیاندووە، وابڕیارە ئەمڕۆ وەزیری دەرەوەی ئێران بە سەردانێک بێتە بەغدا و چاوی بە چەندین کەسایەتی دیاری ناوچەکە بکەوێت و لەبارەی چەندین بابەتی گرنگی تایبەت بە هەردوو وڵاتەوە گفتوگۆ بکرێت.

ئاژانسی ئەنبای عێراقی لە زاری ئیسماعیل بەقائی وتەبێژی وەزارەتی دەرەوەی ئێرانەوە ئاشکرایکردووە، ئەمڕۆ یەکشەممە عەباس عێراقچی وەزیری دەرەوەی ئێران بە سەردانێکی فەرمی و خێرا  سەردانی بەغدا دەکات، سەردانەکەش چەند کاتژمێرێک دەخایەنێت.

ئاماژەی بەوەکردووە، وەزیری دەرەوەی ئێران لە سەردانەکەیدا چاوی بە هەریەک لە (لەتیف رەشید سەرۆککۆمار، محەمەد شیاع سودانی سەرۆکوەزیران، فوئاد حسێن وەزیری دەرەوە)ـی عێراق دەکەوێت و لەگەڵیاندا کۆدەبێتەوە.

ئەوەشخراوەتە ڕوو، ئامانجی سەردانەکەی وەزیری دەرەوەی ئێران بۆ عێراق، تاوتوێکردنی ئەو هەوڵانەیە کە دراون بۆ رێگریکردن لە فراوانبونی شەڕ لە رۆژهەڵاتی ناوەڕاست و پشتیوانی ئاگربەست لە لوبنان و غەززە.

هاوکات، ئەم سەردانەی وەزیری دەرەوەی ئێران لە چوارچێوەی زنجیرەیەک سەردانیدایە بۆ وڵاتانی ناوچەکە وەک (سعودیەک، قەتەر، لوبنان) سەبارەت بە کۆتاییهێنان بە گرژییەکانی ناوچەکە.