بەریتانیا بۆ ئەم مەبەستە پارە بە هەرێمی کوردستان دەدات
SNN
بەریتانیا لە رێگەی دانوستانەوە دەیەوێت حکومەتی هەرێمی کوردستان رەزامەندی نیشانبدات بۆ رێگریکردن لە کۆچبەران، لە بەرامبەردا بەریتانیا پارە بە هەرێمی کوردستان دەدات.
ئەمڕۆ دووشەممە 18ی تشرینی دووەم، رۆژنامەی تایمزی بەریتانی بڵاویكردووەتەوە، حكومەتی بەریتانیا دانوستانی لەگەڵ توركیا و ڤێتنام و بەرپرسانی هەرێمی كوردستانی عێراق دەستپێكردووە، بۆ پێدانی پارە پێیان بە ئامانجی كەمكردنەوەی رۆیشتنی كۆچبەران بەرەو بەریتانیا.
لە رۆژنامەکەدا هاتووە، ئیڤێت كوپەر، وەزیری ناوخۆی بەریتانیا لە گفتوگۆدایە لەگەڵ ژمارەیەك حكومەت، لەنێویاندا حكومەتی كوردستان و توركیا و ڤێتنام، گفتوگۆکانیش سەبارەت بە هاوكاری و رێككەوتنی ئەمنییە، بە ئەگەری زۆرەوە پێش کۆتایی ئەمساڵ کۆتایی بە گفتوگۆکان دەهێنرێن.
هاوکات، كەیر ستارمەر، سەرۆك وەزیرانی بەریتانیا لە كاتی رۆیشتنی بۆ بەشداریكردن لە لوتكەی 20 لە بەرازیل بە رۆژنامەنووسانی راگەیاند، كارێكی دروستە بۆ بەریتانیا كە خەڵك لە جێهێشتنی وڵاتەكانیان پەشیمان بكاتەوە چونكە هەندێكجار بۆ پەڕینەوەیان لە كەناڵی ئینگلیز ژیانی خۆیان دەكەنە مەترسیەوە.
