SNN-
لەگەڵ دەستپێکردنەوەی هەناردەی نەوتی هەرێمی کوردستان، نرخی نەوتی خاوی برێنت لە بازاڕەکانی جیهان لە سەرووی 70 دۆلارەوە مامەڵەی پێوەدەکرێت. بەرزبوونەوەی نرخی نەوت هاوکاتە لەگەڵ کەمبوونەوەی نەوتی یەدەگی ئەمەریکا و هێرشەکانی ئۆکرانیا بۆ سەر ژێرخانی وزەی ڕووسیا.
نرخی نەوت لە بازاڕەکاندا
نرخی یەک بەرمیل نەوتی برێنت گەیشتووەتە 70 دۆلار و 13 سەنت و بە رێژەی 1.02% بەرزبوونەوەی تۆمارکردووە. هەروەها یەک بەرمیل نەوتی خاوی تەکساس بە 65 دۆلار و 72 سەنت مامەڵەی پێوە دەکرێت و بە رێژەی 1.14% بەرزبوونەوەی تۆمارکردووە.
هۆکارەکانی بەرزبوونەوەی نرخی نەوت
لەسەر بنەمای هەفتانە، نرخی نەوتی خاو لە جیهاندا زیاتر لە سێ دۆلار بەرزبوونەوەی تۆمارکردووە. هۆکارەکانی ئەم بەرزبوونەوەیە دەگەڕێنەوە بۆ:
-کەمبوونەوەی نەوتی یەدەگی ئەمەریکا.
-هێرشەکانی ئۆکرانیا بۆ سەر ژێرخانی وزەی ڕووسیا کە هەناردەی نەوتی خاوی ڕووسیای سنووردار کردووە.
-کۆمپانیای “بی پی”ی بەریتانی پێشبینی زیادبوونی خواست لەسەر نەوتی جیهانی کردووە، بە ئاماژەدان بە خاوبوونەوەی هەوڵەکان بۆ زیادکردنی کارایی وزە لە سەرانسەری جیهاندا.
دەستپێکردنەوەی هەناردەی نەوتی هەرێم
ئەمە لە کاتێکدایە کە رۆژی شەممە، 27ی ئەیلول پاش زیاتر لە 30 مانگ لە راگرتنی، کاتژمێر 6:00ی بەرەبەیانی، هەناردەی نەوتی هەرێمی کوردستان دەستیپێکردەوە، کە لە 25ی ئازاری 2023 راگیرابوو. وەزارەتی نەوتی عێراق لە راگەیەندراوێکدا رایگەیاند، هەناردەکردنەوەی نەوتی هەرێمی کوردستان دەبێتە هۆی پاڵپشتی و بەهێزکردنی ئابووریی نیشتمانی.
کاریگەری لەسەر بودجەی عێراق و هەرێم
بەگوێرەی یاسای بودجەی سێ ساڵەی عێراق، خەمڵاندنی یەک بەرمیل نەوت بە 70 دۆلار دیاریکراوە. بەرزبوونەوەی نرخی نەوت سوودی دارایی و ئابووری بۆ عێراق و هەرێمی کوردستان دەبێت
