كێڵگە پەلەوەریەكان داوای دانانی بۆرسەی دیاری كردنی نرخ دەكەن

عەلی حەمەسەعید-SNN
سەرۆكی كۆمەڵەی كێڵگە پەلەوەریەكانی پارێزگای سلێمانی ئاماژەبەوەدەكات بەمەبەستی دانانی میكانزمێك بۆ دیاریكردنی نرخی گۆشتی مریشكی زیندوو لە كێڵگەكان و هەروەها بازاڕەكان، بەپێی ڕۆژ بە پێویستی دەزانین بۆرسەیەكی تایبەت بە مریشك دابندرێت.
نازم عەبدوڵا، سەرۆكی كۆمەڵەی كێڵگە پەلەوەریەكان بە SNNی ڕایگەیاند: وەك كۆمەڵەی كێڵگە پەلەوەرییەكانی سلێمانی داوامان لە وەزارەتی كشتوكاڵ كردووە هەستن بە دانانی میكامزمێكی گونجاو بۆ دەستپێكردنی بۆرسەیەك تایبەت بە دیاریكردنی نرخ بۆ مریشك كە لە ڕێگەی كۆمەڵەكەمانەوە بێت، ئەوەش لە پێناو ئەوەی بەرچاو ڕوونییەك هەبێت بۆ خاوەن كێڵگە پەلەوەرییەكان بزانن چۆن نرخەكان دیاری بكەن.

ئاماژەی بەوەشكرد، لەئێستادا نرخی مریشك لە ناو كێڵگە پەلەوەرییەكان بەجۆرێك دیاری دەكرێت كە خاوەن كێڵگەكان و كڕیاران هەر جارە و لەسەر جۆرە نرخێك ڕێكدەكەون، ئەوەش زیانری زۆری بە خاوەن كێڵگەكان گەیاندووە، بەلام ئەگەر بۆرسەیەكی تایبەت دروست بكرێت دەتواندرێت نرخی مریشك لە ڕۆژدا دیاریبكرێت، نەك كاتێك مریشك لە ناو كێڵگەكان باردەكرێت.

سەرۆكی كۆمەڵەی كێڵگە پەلەوەرییەكان ئەوەشی خستەڕوو، حكومەت دەتوانێت ئەم كارە ڕێكبخات و لەڕێگەی كۆمەڵەكەمانەوە دەتوانێت نرخ دیاری بكرێت و پاشان بخرێتە بازارەو بە ڵام تا ئێساتا ئەمە نەكراوە، لەكاتێكدا هەرێمی كوردستان ساڵانە پێویستمان بە 147 هەزار تۆن مریشكە، بەڵام كێڵگە پەلەوەرییەكان ساڵانە نزیكەی 400 هەزار تۆن مریشك بەرهەم دەهێنن.