لە SNNەوە وادەی دابەشكردنی مووچەی مانگی 9 و دابەشنەكردنی دوو مووچەی ئەمساڵ بزانە

عەلی حەمە سەعید-SNN
لەگەڵ ئەوەی وابڕیار بووكە پێش هەڵبژاردنی پەرلەمانی عێراق مووچەی مانگی نۆی فەرمانبەرانی هەرێم دابەشبكرێت، بەڵام ئەنجومەنی وەزیرانی عێراق بڕیاری خەرجكردنی پارەی بۆ دوای هەڵبژاردنەكان دواخست، هاوكات SNNزانیاری ورد لەسەر مووچەی مانگەكانی داهاتوو دەخاتەڕوو

بەگوێرەی ئەو زانیارییانەی كە لە بەرپرسانی كورد لە بەغدا بە SNNدراون ئەوەخراوەتەڕوو، دابەشكردنی مووچە و ناردنی پارەی فەرمانبەرانی هەرێم دەكەوێتە دوای دابەشكردنی مووچەی مانگی 11ی فەرمانبەرانی عێراق كە ئەوەش لە دوای 20ی ئەم مانگەوە دەستپێدەكات ئەوەش دوای ئەوەی هەرێم داهاتی 120 ملیار دیناری ڕەوانەی بەغدا كرد.

ئاماژەی بەوەشكرد، بۆ مووچەی مانگی 10 ی فەرمانبەرانی هەرێم لەگەڵ دابەشكردنی مووچەی مانگی 12ی فەرمانبەرانی عێراق دەستپێدەكات، كە ئەوەش دەكەوێتە كۆتایی مانگی 12، بەهەمان شێوەش دەبێت هەرێم داهاتی 120 ملیار دیناری داهاتی ناوخۆ ڕەوانەی بەغدا بكات.

هەر بە گوێرەی زانیارییەكانی SNN لەدوای دابەشكردنی مووچەی مانگی 10 كە دەكەوێتە كۆتایی مانگی 12، ئەوكات وەزارەتی دارایی عێراق كۆتایی بە ساڵی دارایی دەهێنێت، بەوجۆرەش بە ئەگەرێكی زۆرەوە مووچەی مانگەكانی 11 و هەروەها مانگی 12ی فەرمانبەرانی هەرێم خەرج ناكرێت و چارەنووسیان نادیار دەبێت.