نهێنی ڕاگرتنی هێرشە گەورەکەی ئەمریکا بۆ سەر ئێران ئاشکرابوو

SNN-

لە پەرەسەندنێکی خێرای دۆخی سیاسی و سەربازیدا، دۆناڵد ترەمپ، سەرۆکی ئەمریکا، ڕایگەیاند کە هێرشە سەربازییەکەی وڵاتەکەی بۆ سەر کۆماری ئیسلامیی ئێران هەڵوەشاندووەتەوە. بڕیارەکە دوای شەپۆلێک گوشاری دیپلۆماسیی وڵاتانی ناوچەکە هات، لەوانەش پەیوەندییەکی تەلەفۆنیی ڕاستەوخۆ لەلایەن شازادەی جێنشینی سعودیەوە، بە ئامانجی گەیشتن بە ڕێککەوتنێکی بەپەلە سەبارەت بە کردنەوەی گەرووی هورمز و کۆتاییهێنان بە پرۆگرامە ئەتۆمییەکەی تاران.

ترەمپ لە کۆمەڵێک لێدواندا جەختیکردەوە کە هێزە چەکدارەکانی ئەمریکا لەوپەڕی ئامادەباشیدان بۆ هەر رووبەڕووبوونەوەیەک، بەڵام وتی: “لەپێناو داهاتووی جیهان و مانەوەی ئێراندا، ڕەزامەندیم دا لەسەر هەڵوەشاندنەوەی هێرشەکە بە مەرجی گەیشتن بە ڕێککەوتنێکی خێرا.” ناوبراو ئەوەشی خستەڕوو کە ئێران و چەند وڵاتێکی تری ناوچەکە داوایان کردووە هێرشەکە دواخات، پاش ئەوەی لەسەر هێڵە سەرەکییەکانی ڕێککەوتنێک ڕێککەوتوون، کە دیارترینیان کردنەوەی تەواوەتی گەرووی هورمز و هەڵگرتنی هەڕەشەی ئەتۆمییە. هاوکات حکومەتی ئیسرائیلیش ئامادەییی خۆی بۆ ئەم هەنگاوە نیشانداوە ئەگەر ڕێککەوتنەکە بێتەدی.

لە لایەکی ترەوە، پێگەی “ئاکسیۆس” بڵاوی کردەوە کە محەمەد بن سەلمان، شازادەی جێنشینی سعودیە، لە پەیوەندییەکی تایبەتدا نیگەرانیی قووڵی خۆی بە ترەمپ گەیاندووە و داوای ڕێگریگرتن لە پەرەسەندنی جەنگەکەی کردووە. جگە لە ریاض، وڵاتانی وەک قەتەر، ئیمارات، تورکیا و پاکستان ڕۆڵی بەرچاویان هەبووە لە فشارخستنە سەر لایەنەکان بۆ هێورکردنەوەی دۆخەکە.

لە بەرامبەردا، عەباس عێراقچی، وەزیری دەرەوەی ئێران، جموجوڵە دیپلۆماسییەکانی چڕ کردووەتەوە و لەگەڵ فەرماندەی سوپای پاکستان (کە وەک ناوبژیوان دەوری بینیوە) و هاوتا تورک و سعودییەکەی کۆبووەوە. عێراقچی لە پەیوەندیიەکەیدا لەگەڵ لایەنی سعودیدا هۆشداریی توندی داوە و ڕایگەیاندووە، هەر جۆرە هاوکارییەک یان بەشداریکردنێک لەلایەن وڵاتانی ناوچەکەوە لە هەر هێرشێکی ئەمریکا یان ئیسرائیلدا، ڕووبەڕووی وەڵامێکی کوند و یەکلاکەرەوەی هێزە چەکدارەکانی ئێران دەبێتەوە.