مژدە بۆ فەرمانبەران؛ وەزارەتی دارایی بڕیاری کۆتایی لەسەر پلەبەرزکردنەوە دا

SNN-

وەزارەتی دارایی و ئابووریی حکوومەتی هەرێمی کوردستان بە نووسراوێکی فەرمی کە ئەمڕۆ پێنجشەممە 13ـی 8ـی 2026 دەرچووە، ڕێکارە نوێیەکانی تایبەت بە پلەبەرزکردنەوەی فەرمانبەرانی ڕاگەیاند.

بەپێی ئەو نووسراوەی کە واژۆی ئاوات جەناب نوری، وەزیری دارایی و ئابووری لەسەرە، بڕیاردراوە بە دەستپێکردنەوەی پڕۆسەی پلەبەرزکردنەوەی فەرمانبەران لە پلە (10) بۆ پلە (1)، بەمەرجێک ڕێکارەکان بەپێی ڕێنماییە داراییەکان و یاسای مووچەی فەرمانبەرانی دەوڵەت ژمارە (22)ـی ساڵی 2008 جێبەجێ بکرێن.

وەزارەتی دارایی جەخت دەکاتەوە کە ئەم بڕیارە بە مەبەستی ڕێکخستنەوەی مافی فەرمانبەران و مووچەخۆرانە، هەروەها داوا لە سەرجەم وەزارەت و فەرمانگەکان دەکات پابەند بن بە دابینکردنی جیاوازی مووچە و دەرماڵە و شایستە داراییەکانی ساڵانی ڕابردوو، بەو مەرجەی ڕێکارەکانی پلەبەرزکردنەوە بەپێی خشتە هاوپێچەکان و ڕێنماییەکان بێت.

پێشتر ئەم پڕۆسەیە بەهۆی قەیرانی داراییەوە ڕاگیرابوو، بەڵام بەم بڕیارە نوێیە، دەرگایەک بۆ کۆتاییهێنان بە چاوەڕوانیی ساڵانی ڕابردووی فەرمانبەران و گێڕانەوەی مافە داراییەکانیان کرایەوە.