مووچە و وەزارەتی دارایی
SNN-
ئامادەکردنی لیستی مووچەی مانگی 9 فەرمانبەرانی هەرێمی کوردستان بە سیستمی پەیڕۆڵ گەیشتووەتە قۆناغی کۆتایی و ئامادە کراوە.
فرسەت سەلیم، بەڕێوەبەری بایۆمەتریی دهۆک رایگەیاند، لیستى مووچەى مانگى 9 بە سیستمى پەیڕۆڵ تەواو بووە و ڕەوانەى وەزارەتى دارایی و ئابوورى دەکەین و بڕیارە هەفتەی داهاتوو وەزارەتی دارایی هەرێمی کوردستان لیستەکە بە مەبەستی وردبینی و خەرجکردنی شایستە داراییەکان ڕەوانەی وەزارەتی دارایی عێراق بکات.
هاوکات، یادگار جەبار، سەرپەشتیاری بایۆمەتریی سلێمانى ئەوەى خستەڕوو کارەکانیان لە کۆتاییدایە و گەنجینەکان وردبینى بۆ لیستى مووچە بە سیستمى پەیڕۆڵ دەکەن.
لیستی مووچەی مانگی ئەیلوولى مووچەخۆرانى هەرێمى کوردستان لەلایەن هەزار و 189 یەکەی ژمێریارییەوە بە سیستمی پەیڕۆڵ ئامادە دەکرێت و وەزارەتی دارایی هەرێمی کوردستان سەرقاڵی کۆکردنەوەی لیستی سەرجەم پارێزگاکانە بۆ ئەوەی بە ئەلیکترۆنی ڕەوانەی بەغدادیان بکات، بەڵام لیستی مووچەی خاوەن پێداویستیی تایبەت و کەسوکاری شەهیدان بە جیاواز لە سیستمی پەیڕۆڵ ئامادە دەکرێن.
هاوکات شاندی تەکنیکیی دارایی هەرێمی کوردستان لیستە پەسەندکراوەکانی مانگی 9 دەباتە بەغدا تاوەکو دوای دڵنیابوونەوە لە وردبینییەکان، پرۆسەی خەرجکردنی پارەکە بکەوێتە بواری جێبەجێکردنەوە، پاش گەیشتنی لیستەکان بە وەزارەتی دارایی عێراق، وردبینی لە ناوەکان و بڕی پارەکە دەکرێت و شاندی تەکنیکیی هەرێمی کوردستان ڕوونکردنەوە لەسەر هەر گۆڕانکارییەک دەدات.
تەمویلکردنی مووچە دوای دابەشکردنی مووچەی وەزارەتەکانی عێراق دەکرێت و بە گەیشتنی پارەکە، وەزارەتی دارایی هەرێمی کوردستان خشتەی دابەشکردن ڕادەگەیێنێت.
ئامادەکردنى لیستی مووچەی مانگی 9 لەکاتێکدایە، بەغداد تەمویلی مووچەی مانگی 8ـى خەرج کرد لە 14ـى ئەیلوول کە بڕەکەى 831 ملیار و 666 ملیۆن دینار بوو، هاوکات 120 ملیار دینارى داهاتى نانەوتیی لە کۆى تەمویلى مووچەکە بڕیوە.
