وەزارەتی کارەبا: بەرهەمهێنان گەیشتووەتە 1500 مێگاوات و 6- 7 کاتژمێر کارەبا دەدرێتە هاووڵاتییان

SNN-

بەرهەمهێنانی کارەبا لە هەرێمی کوردستان بەهۆی  هێرشەکەی سەر کێڵگەی غازی کۆرمۆر بۆ 1000 تا 1200 مێگاوات دابەزی، بەڵام وتەبێژی وەزارەتی کارەبا دەڵێت: ئێستا بەرهەمهێنانمان بۆ 1500 مێگاوات بەرزکردووەتەوە’.

ئومید ئەحمەد، وتەبێژی وەزارەتی کارەبای هەرێم بە SNN-ی رایگەیاند:  لە سەرەتای ڕووداوەکەوە و لە دوای پچڕانی غاز، بەرهەمهێنان بۆ 1000 تا 1200 مێگاوات دابەزیبوو،  بەڵام ئێستا توانراوە بەرهەمهێنان بەرزبکرێتەوە بۆ 1500 مێگاوات. دەشڵێت: لە ڕۆژانی سەرەتای ڕووداوەکەدا بەهۆی کێشەکانەوە تەنها 3 بۆ 4 کاتژمێر کارەبا هەناردە دەکرا, بەڵام ئێستا دۆخەکە باشتر بووە و لە هەندێک شوێن کاتژمێرەکانی پێدان بۆ 6 بۆ 7 کاتژمێر بەپێی توانا بەرز کراوەتەوە.

وتیشی: لەڕێگەی هەماهەنگی لەگەڵ وەزارەتی سامانە سروشتییەکان و بە بەکارهێنانی بڕێکی زیاتر لە غازوایل و سووتەمەنی پێویست، هەوڵ درا کە کەمترینی کاریگەری لەسەر سیستمی کارەبا هەبێت.

وتەبێژی وەزارەتی کارەبا دەشڵێت: لایەنە پەیوەندیدارەکان و تیمە تەکنیکییەکان توانیویانە دۆخەکە کونترۆڵ بکەن، و لە هەوڵ بەردەوامداین بۆ ئەوەی لە زووترین کاتدا قەرەبووی ئەو کورتهێنانە بكرێتەوە و دۆخی هەناردەی غاز و بەرهەمهێنانی کارەبا ئاسایی ببێتەوە.