دوای زیادبوونی هەڕەشەکانی ئێران؛ وەزیری گەنجینەی ئەمریکا بۆ بنکەیەکی سەربازی گواسترایەوە
SNN
سکۆت بێسێنت، وەزیری گەنجینەی ئەمریکا، دوای ئەوەی هەڕەشەکانی کۆماری ئیسلامی ئێران بۆ سەر ژیانی گەیشتنە ئاستێکی زۆر مەترسیدار، ناچار بوو بەخۆی و خێزانەکەیەوە ڕوو لە بنکەیەکی سەربازیی پارێزراو بکەن.
بەرپرسێکی باڵا لە ئیدارەی ئەمریکا بە تۆڕی “فۆکس نیوز”ی ڕاگەیاندووە: “هەڕەشەکانی ئێران بۆ سەر گیانی وەزیری گەنجینە لە ئاستی هەڕەشەی ئاسایی تێپەڕیوە، هەر بۆیە بێسێنت و خێزانەکەی بڕیاریان داوە بەرەو شوێنێکی ئاسایش‌پارێزراو لە ناو بنکەیەکی سەربازیدا بگوازرێنەوە.”
لە بەرامبەردا، وەزارەتی گەنجینەی ئەمریکا لە ڕاگەیەندراوێکدا پرۆسەی گواستنەوەکەی پشتڕاستکردەوە و جەختیکردەوە: وەزیری گەنجینە لە بەرامبەر هیچ هەڕەشەیەکی رژێمی ئێراندا مل کەچ ناکات.
وتیشی: بێسێنت بەردەوام دەبێت لە سەرکردایەتیکردنی هەوڵەکان بۆ گۆشەگیرکردنی دارایی ئێران لە ڕێگەی سەپاندنی سزای قورس و توندکردنەوەی کۆتوبەندە بازرگانییەکان.
تۆڕی فۆکس نیوز ئاماژەی بەوەش کردووە، سکۆت بێسێنت تەنها بەرپرس نییە لە ئیدارەی ئەمریکادا کە لەبەر هۆکاری ئاسایش و گەیشتنی هەڕەشەکان گوازراوەتەوە بۆ شوێنی نیشتەجێبوونی تایبەت و پارێزراو.
