ئامادەکارییەکان بۆ دابەشکردنی نەوت دەستیان پێکرد؛ سەرەتا لە شوێنە شاخاوییەکانەوە دابەشدەکرێت

SNN

لە کاتێکدا بەرمیلێک نەوت لە بازاڕەکاندا گەیشتووەتە 320 هەزار دینار، بەڕێوەبەرایەتی نەوت و کانزاکانی سلێمانی ئامادەکارییەکانی بۆ هێنانی نەوتەکەی بەغدا و دابەشکردنی بەسەر هاووڵاتییاندا خێرا کردووە.

سەلام عومەر، وتەبێژی بەڕێوەبەرایەتی نەوت و کانزاکانی سلێمانی لە لێدوانێکی تایبەتدا بۆ SNN ڕایگەیاند: “ئێستا سەرقاڵی ئەوەین کۆمپانیایەک رابسپێردرێت بۆ وەرگرتنی نەوتەکەی بەغدا، لە ماوەی کەمتر لە هەفتەیەکدا رەنگە نەوتەکە بگاتە سلێمانی و دەستبەجێ دەست بە دابەشکردنی دەکرێت.”

لەبارەی میکانیزمی دابەشکردنەکەوە، وتەبێژی نەوت و کانزاکانی سلێمانی ڕوونی کردەوە: پرۆسەی دابەشکردنی نەوت لە ناوچە شاخاوییە سەختەکانەوە دەستپێدەکات.

وتیشی: دوای ناوچە شاخاوییەکان، دابەشکردنەکە دەگاتە ناو شارەکان و لە ناو سەنتەری شاری سلێمانی، دابەشکردنەکە بە دیارییكراوی لە مەڵبەندی 8-ەوە دەستپێدەکات، چونکە ساڵی ڕابردوو پرۆسەی دابەشکردن لەو مەڵبەندەدا وەستابوو.

سەرەڕای هاتنی وەرزی سەرما و دابەزینی پلەکانی گەرما تاوەکو ئێستا حکومەتی کاربەڕێکەری پارتی نەیتوانیوە نەوتی سپی بەسەر هاووڵاتییاندا دابەشبکات و نرخی یەک بەرمیل نەوتیش گەیشتووەتە 320 هەزار دینار.