ئەمڕۆ و سبەی؛ کۆڕبەندی ستراتیجیی سلێمانی بە بەشداریی دەیان سەرکردە و کەسایەتیی ناوخۆیی و جیهانی دەست پێ دەکات

SNN-
ئەمڕۆ و سبەی، کۆڕبەندی ستراتیجیی سلێمانی لەژێر چاودێریی سەرۆکایەتیی کۆماری عێراق و قوباد تاڵەبانی، بە بەشداریی چەندین سەرکردە و کەسایەتیی سیاسی، ئابووری، ئەمنی و سەربازی لە ئاستی هەرێمی کوردستان، عێراق و جیهان بەڕێوەدەچێت.

بەپێی زانیارییەکانی کۆڕبەندەکە، 73 سەرکردە و کەسایەتیی ناوخۆیی، عێراقی، هەرێمی و جیهانی وتاریان دەبێت، دیارترین بەشداربووانی ناوخۆیی و عێراقیش پێکدێن لە سەرۆککۆماری عێراق، بافڵ جەلال تاڵەبانی سەرۆکی یەکێتیی نیشتمانیی کوردستان، قوباد تاڵەبانی، باسم خزەیر وەزیری نەوت و خالید شوانی وەزیری دادی عێراق.

هەروەها لە ئاستی نێودەوڵەتیدا، ژمارەیەک کەسایەتیی باڵا بەشداری تێدا دەکەن، لەوانە: عەلی باباجان سەرۆکی پارتی دیموکراسی و پێشکەوتنی تورکیا، وەزیری دەرەوەی یۆنان، وەزیری دەوڵەتی شانشینی هۆڵەندا، وەزیری پێشووی وەبەرهێنانی بەریتانیا و جەیمس هیپی وەزیری پێشووی دەوڵەت لە بەریتانیا بۆ کاروباری هێزە چەکدارەکان.

ئامانج و کارەکانی کۆڕبەندەکە

ئامانجی سەرەکیی کۆڕبەندەکە بریتییە لە کۆکردنەوەی سەرکردە سیاسییەکان، فەرماندە سەربازییەکان، بازرگانان و بیرمەندان بۆ گفتوگۆکردن لەسەر ئاڵنگارییە ستراتیجییەکان و بەهێزکردنی هاوکاری لە بوارەکانی ئاسایش، ئابووری، دیپلۆماسی و سەقامگیریی ناوچەکەدا.

جگە لەوەش، کۆڕبەندەکە دەستەیەکی ڕاوێژکاریی نێودەوڵەتیی باڵای هەیە کە کەسایەتییە دیارەکانی وەک سەرۆکەکانی پێشووی ئۆکراینا، کۆڵۆمبیا، نەیجیریا و سەنیگال، لەگەڵ سەرۆکی پێشووی دەزگای هەواڵگریی بەریتانیا (MI6) و فەرماندە باڵاکانی ئەمریکا و ناتۆ لەخۆدەگرێت.

گفتوگۆکانی پانێڵەکانی ئەم خولە تایبەت دەبن بە داهاتووی سەقامگیری لە ڕۆژهەڵاتی ناوەڕاست، لێکۆڵینەوە لە ئاڵنگارییە جیۆپۆلەتیکییەکان و کاریگەرییان لەسەر ئاسایشی ناوچەکە، دۆخی ئابووری و دەرفەتەکانی وەبەرهێنان، تاوتوێکردنی میکانیزمەکانی هەماهەنگیی ئەمنی، و پەرەپێدانی دیدگای هاوبەش بۆ ڕووبەڕووبوونەوەی گۆڕانکارییە ئابوورییەکانی ناوچە و جیهان.

پێگەی سلێمانی

بەڕێوەچوونی ئەم کۆڕبەندە گرنگییەکی زۆری بۆ شاری سلێمانی هەیە و پێگەی شارەکە وەک ناوەندێکی گرنگی نێودەوڵەتی بۆ گفتوگۆکردن لەسەر داهاتووی ئاسایش، ئابووری و دیپلۆماسی لە عێراق و ڕۆژهەڵاتی ناوەڕاستدا بەهێزتر دەکات، بە جۆرێک کە دەبێتە وێستگەیەکی دانپێدانراو لە ڕۆژمێری ستراتیجیی نێودەوڵەتیدا بۆ قووڵکردنەوەی پەیوەندییە دامەزراوەییەکان.