سێ سەرۆکایەتییەکەی عێراق لەسەر پرسی هەڵبژاردنەکان کۆبوونەوە
وێنەی کۆبوونەوەکە
SNN
بە ئامادەبوونی سێ سەرۆکایەتییەکەی عێراق و سەرۆکی ئەنجوومەنی دادوەری و کۆمسیۆنی هەڵبژاردنەکان، نێردەی نەتەوە یەکگرتووەکان لەعێراق، ئەمڕۆ دووشەممە کۆبوونەوەیەک بەڕێوەچوو لەبارەی هەڵبژاردنەکەی ساڵی داهاتوو.
کۆبوونەوەکە لە کۆشکی سەلام بەڕێوەچووە و تیایدا چۆنێتی نەهێشتنی لەمپەرەکان لەبەردەم پڕۆسەی هەڵبژاردنەکە تاوتوێکراوە و چۆنێتی بەڕێوەچوونی بەشێوەیەکی سەلامەت باسی لێوە کراوە.
هاوکات لە کۆبوونەوەکەدا پرۆسەی بایۆمەتری هاووڵاتیان و دەنگدەرانی ناوەوە و دەرەوەی عێراق و ئاوارەکان گەنگەشە کراوە کە چۆن وا بکرێت هەموو هاووڵاتییەک بەدەم نوێکردنەوەی لیستی دەنگدانەکەیەوە بچێت.
لە کۆبوونەوەکەدا قسەش لەسەر ئەوە کراوە کە بە هەماهەنگیی کۆمپانیایەکی جیهانی هەوڵبدرێت داتا و زانیارییەکان چاوخشاندنەوەیان پێدا بکرێت و کەمپەینێکی میدیاییش بێتە ئاراوە تا متمانەی هاووڵاتی بگێڕدرێتەوە بە پڕۆسەی هەڵبژاردن.
