عێراق پلانی هەیە داهاتی نانەوتی وڵات بگەیەنێتە 25%
پارەی عێراقی
SNN
ڕۆژنامەی سەباحی عێراقی ئاشکرایکردووە کە بەهۆی ڕێکارەکانی حکومەتەوە بۆ کۆنترۆڵکردنی دەروازە سنوورییەکان داهاتی دەروازە سنوورییەکان زیادیکردووە، ئەوەش لە چوارچێوەی هەوڵەکانە بۆ زیادکردنی داهاتی نانەوتی بۆ 25%ی کۆی گشتی داهاتی وڵات.
ڕۆژنامەکە ئاشکرایکردووە، دوای جێبەجێکردنی رێکارەکانی کۆنتڕۆڵکردنی دەروازە سنوورییەکان و گرتنەبەری چەند رێکارێکی پێویست لەلایەن مستەفا کازمی سەرۆک وەزیرانی عێراق، داهاتی دەروازە سنورییەکان بۆ نزیکەی پێنج هێندە زیادیکردوە و پلان هەیە زیاتر لە 25%ی داهاتی گشتی عێراق لەو دەروازانە و داهاتە نا نەوتییەکانی دیکە پڕبکرێتەوە.
مەزهەر محەمەد ساڵح، راوێژکاری دارایی سەرۆک وەزیران بە رۆژنامەکەی راگەیاندووە لەئێستادا دهاتی نا نەوتی 5-7%ی کۆی گشتی داهاتی وڵات پڕدەکاتەوە، پلان هەیە ئاستی ئەو داهاتانە بگەیەندرێتە 25%، لەناویاندا باج و گومرگ و داهاتە فیدراڵییەکانی دیکە.
ئەوە لەکاتێکدایە دوێنێ مستەفا کازمی، سەرۆکوەزیرانی عێراق بڕیاریدا بە داخستنی دەروازە سنورییە نافەرمییەکان، بە هۆکاری ئەوەی زیان بەر ئابوری وڵات دەگەیەنێت.
