كار بۆ قەرەبووكردنەوەی ژنانی رزگاربووی ئێزدییەكان دەكرێت

SNN  بریار محەمەد
ئەندامێكی لیژنەی ژنان و خێزان لە پەرلەمانی عێراق رایگەیاند، پەرلەمان خوێندنەوەی دووەمی بۆ پڕۆژەیاسای ژنانی رزگاربووی ئێزدی كردووە و لەكۆتایی ئەمساڵیش پرۆژە یاساكە دەنگی لەسەر دەدرێت.

رێزان شێخ دلێر، ئەندامی لیژنەی ژنان و خێزان لە پەرلەمانی عێراق  بەSNNی راگەیاند “دوای ئەوەی ساڵی 2014 بە هەزاران خێزانی ئێزدی لەلایەن چەكدارانی داعش رفێنراون و تائێستاش بەشێكیان لەژێر دەسەڵاتی ئەو رێكخراوەدان، بۆ قەرەبووكردنەوە و پشتیوانیكردن لە دووبارە خۆ دروستكردنەوەی ئەو كچ و ژنانەی رزگاریان بووە، پڕۆژەیاسای ژنانی رزگاربووی ئێزدی لەپەرلەمان ئامادەكراوە و خوێندنەوەی یەكەم و دووەمی بۆ كراوە لە كۆتایی ئەمساڵیش دەنگی لەسەر دەدرێت و پرۆژە یاساكە دەچێتە بواری جێبەجێكردن .
وتیشی: “لە نێو پرۆژە یاساكەدا ئاماژە بەوە كراوە ئەو كەسانەی دەستگیركراون و دەستدێژییان كراوەتە سەر و بە هەر شێوەیەك مافیان پێشێلكراوە مووچەی تایبەتیان پێدەدرێت و ئەمەش وەكو قەرەبوو كردنەوەیەك لەبەرامبەر ئەو هەموو زوڵمەی لێیانكراوە و هیوادارین هەموو لایەك بە پەرۆشەوە كاری بۆ بكەن بۆ ئەوەی پرۆژەیاساكە لە نێو پەرلەمانی عێراق لە وادەیەی خۆی دەنگی لەسەر بدرێت و بچێتە بواری جێبەجێكردن .
ئاماژەی بەوەشكرد: پڕۆژەكـە دەبێتە یاسایەكی گرنگ بە خزمەتی تەواوی كچان و ژنانی ڕزگاربووی ئێزدی و ساڕێژكردنی بەشێك لە برینەكانیان، لە ماوەی داهاتوو بەڕەچاوكردنی تێبینیەكان هەوڵدەدەین بەزووترین كـات پڕۆژەكە پەسەند بكرێت و ببێت بە یاسایەكـی بەركار و چاودێری جێبەجێكردنی دەكەین بە بەردەوامی.
شایەنی باسە پڕۆژەیاسای ژنانی رزگاربووی ئێزدی لەپەرلەمان ئامادەكراوە و لە2/7/2019  خوێندنەوەی یەكەمی بۆ كراوە لە سەرەتایی هەفتەی رابردووش خوێندنەوەی دووەمی بۆكراوە و بە پێی وتەی پەرلەمنتارانیش بێت لە كۆتایی ئەمساڵ پرۆژەكە پەسند دەكرێت .