جی 20: هاوکاری وڵاتە هەژارەکان دەکەین

SNN

سەرکردەی وڵاتانی جی 20 لەم هەفتەیەدا تاوتوێی ڤاکسینی کۆرۆنا و چارەسەر و پشکنینی ڤایرۆسەکە دەکەن و کاردەکەن بۆ هاوکاریکردنی هەژارترین وڵاتانی جیهان بۆ ئەوەی لە چارەسەری ئەو قەیرانانەی کە کۆرۆنا دروستیکردوون، بێبەش نەبن.

لە کۆبوونەوەکەی ئەمڕۆدا، سەلمان بن عەبدولعەزیز پادشای سعودیە رایگەیاند: پێویستە بارودۆخێکی وا بڕەخسێنین کە هەموو کەسێک دەستی چارەسەر و ڤاکسین و پشکنین بگات، بە نرخێکی گونجاو.

سەرانی جی 20 هاوڕابوون لەوەدا کە پێدەچێت کۆرۆنا چینایەتی زیاتر دروستبکات و درزی نێوان هەژار و دەوڵەمەند قوڵتربکاتەوە.

پادشای سعودیە وتیشی: دەبێت ئامادەبین بۆ هەر پەتایەکی دیکە کە لە داهاتوودا رووبدات، ئەگەرچی گەشبینی خۆشی نیشاندا لەو بەرەوپێشچوونانەی کە لە دۆزینەوەی ڤاکسین و شیکاری نەخۆشیەکەدا هەبوون.

کۆڕبەندەکە کە ئەمساڵ سعودیە، وەک یەکەم وڵاتی عەرەبی بەڕێوەیدەبات، ماوەی دوو رۆژ دەخایەنێت، سەرانی کۆڕبەندەکە لەرێگەی ڤیدیۆ کۆنفرانسەوە بەشدارن.