لەکاتی یاریکردن لەگەڵ سەگەکەی، بایدن دەکەوێت بەزەویدا

SNN

جۆو بایدن سەرۆکی نوێی ئەمریکا ئێوارەی رۆژی یەکشەممە لەکاتی یاریکردنی لەگەڵ “میجور”ی سەگەکەیدا تووشی شکانێکی کەم بووە لە پاژنەپێی راستیدا.

سەرۆکی داهاتووی ئەمریکا سەردانی کلینیکێکی شکاویی کردووە و دەرکەوتووە لە بەستەرەکانی پاژنە پێیدا تووشی پچڕانێکی بچووک هاتووە.

کیڤن ئۆکۆنور پزیشکی تایبەتی جۆو بایدن-ی 78 ساڵ دەڵێت: “تیشکی ئێکس رای بۆ سەرۆک ئەنجامدراوە و لەجێچوونێکی کەم هەیە لە پاژنەپێیدا، بۆیە بۆ ماوەی چەند رۆژێک ناچار دەبێت پێڵاوی تایبەتی پزیشکی لە پێ بکات”.

دۆناڵد ترەمپ سەرۆکی ئەمریکا لە تویتێکیدا هیوای زوو چاکبوونەوەی بۆ بایدن خواستووە و ئەو گرتە ڤیدیۆییەشی بڵاوکردووەتەوە کە تیایدا بایدن دەبرێت بۆ چارەسەر.

بڕیار وایە جۆو بایدن لە رۆژی 20ی کانوونی دووەمی ساڵی داهاتوو، وەک سەرۆکی نوێی ئەمریکا سوێندی یاسایی بخوات و بەوەش دەبێتە بەتەمەنترین سەرۆک لە مێژووی ویلایەتە یەکگرتووەکانی ئەمریکادا.