یۆنان بە تۆمەتی سیخوڕی بەرپرسێکی کونسوڵخانەی تورکیا دەستگیردەکات

SNN

پۆلیسی یۆنان بەرپرسێکی کونسوڵخانەی تورکیای دەستگیرکردووە بە تۆمەتی سیخوڕیکردن، کە پێشبینی دەکرێت ئەو کارە ئاڵۆزی زیاتر بخاتە نێوان پەیوەندییەکانی تورکیا و یۆنانەوە.

ئاژانسی هەواڵی رۆیتەرز بڵاویکردەوە، ئەو دیپلۆماتکارەی کە دەستگیرکراوە کارمەندبووە لە کونسوڵخانەی تورکیا لە دوورگەی رۆدێس-ی سەر بە یۆنان، ئەمڕۆ هەینی دەستگیرکراوە دوای ئەوەی هەفتەی رابردوو لە بەردەم پۆلیسدا وتەی لێوەرگیراوە.

پۆلیسی یۆنان وتوویەتی، جگە لەو پیاوە تورکە، کەسێکی دیکە دەستگیرکراوە کە ناسنامەی یۆنانی هەیە و بەناو چێشتلێنەربووە لە کەشتییەکی هێڵی رۆدێس-کاستێلۆریزۆ(کاستێلۆریزۆ دوورگەیەکی بچووکی یۆنانە و نزیکە لە کەناراوی تورکیاوە).

تا ئێستا تورکیا بە فەرمی هەڵوێستی خۆی لەوبارەیەوە نیشاننەداوە.