رێزان شێخ دلێر: قوباد تاڵەبانی زۆر بەڕوونی وتوویەتی نایانەوێت بێ ئەنجام بگەڕێنەوە
ڕێزان شێخ دلێر، ئەندامی پێشووی ئەنجوومەنی نوێنەرانی عێراق
SNN-عەلی حەمە سەعید
ئەندامێكی ئەنجومەنی نوێنەرانی عێراق رایگەیاند: قوباد تاڵەبانی جێگری سەرۆکی حکومەت لە کۆبوونەوەی شاندەکەی لەگەڵ دەستەی سەرۆکایەتی و پەرلەمانتارانی عێراق زۆر بەڕوونی وتوویەتی، ئەوان بۆ رێككەوتن هاتوون و نایانەوێت بە بێ ئەنجام بگەڕێنەوە.
ڕێزان شێخ دلێر، ئەندامی ئەنجومەنی نوێنەرانی عێراق لە فراكسیۆنی یەكێتی بە SNNی ڕاگەیاند: ئەو بیروبۆچوونەی كە پێشتر لە لایەن پەرلەمانتارە عەرەبەكان دروستبوو بوو لەسەر هەرێمی كوردستان و شاندی دانوستاندكاری هەرێم بە سەرۆكایەتی قوباد تاڵەبانی زۆر گۆڕانكاری بەسەرداهاتووە لە ئێستادا ئەوەش دوای ئەوەی شاندەكەی حكومەت هاتنە پەرلەمانی عێراق و بەڕاشكاوانە باسیان لە وردەكاری گفتوگۆ و دانوستانەكانیان كرد بۆ دەستەی سەرۆكایەتی و سەرۆك فراكسیۆن و ئەندامانی لیژنەی دارایی و یاسایی پەرلەمانی عێراق
ئاماژەی بەوەشكرد، قوباد تاڵەبانی لە پەرلەمانی عێراق گەرەنتی داوە بە پەرلەمانتاران و ئامادە بووانی كۆبوونەوەكە كە لەحاڵەتی گەیشتن بە ڕێككەوتنیان لەگەڵ حكومەتی عێراق ئەگەر لەلایەن حکومەتی هەرێمەوە ئەو رێككەوتنە وەك خۆی جێبەجێ نەكرا، “ئەوا وەرن لە هۆڵە گەورەكەی پەرلەمان بانگم بكەن و لێپرسینەوەم لەگەڵ بكەن”، بۆیە زۆر بەڕوونی ئەوەی بە ئامادە بووانی كۆبوونەوەكە گەیاندووە كە ئەوان بۆ رێككەوتن هاتوون و نایانەوێت بە بێ ئەنجام بگەڕێنەوە.
ئەو ئەندامەی فراكسیۆنی یەكیتی لە ئەنجومەنی نوێنەرانی عێراق ئەوەشی خستەڕوو، بە دڵنیاییەوە لە ڕۆژانی داهاتوودا دانیشتن و كۆبوونەوەكانی شاندی باڵای حكومەتی هەرێم لە بەغدا لەگەڵ بەرپرسانی حكومی و حزبی عێراق بەردەوامییان دەبێت تا ئەوكاتەی هەردولا دەگەنە رێككەوتنێك كە لە بەرژەوەندی هەردولادا بێت.
