وەزیری نەوتی عێراق: هەرێم پابەند نەبووە بە کەمکردنەوەی بەرهەمهێنانی نەوت

SNN

وەزیری نەوتی عێراق دەڵێت “هەرێمی کوردستان پابەند نەبووە بە کەمکردنەوەی بڕی بەرهەمهێنان کە رێکخراوی ئۆپیک سەپاندوویەتی، ئاشکراشیدەکات “نرخی نەوت لەمساڵدا سەقامگیریی بەخۆیەوە دەبینێت لە نزیک 57 دۆلار بۆ بەرمیلێک”.

ئیحسان عەبدولجەبار راشیگەیاند “کەمکردنەوەی بڕی یەک ملیۆن بەرمیل نەوتی رۆژانە لەلایەن سعودیەوە کارێکی باشە و بازاڕەکان سەقامگیر دەکات و وا دەکات هیچ نەبێ لە چارەگی یەکەمی ئەمساڵدا بەرمیلێک نەوت لە 57 دۆلاردا بووەستێت”.

وەزیری نەوتی عێراق دەشڵێت: “تکامان کردووە قەرەبووی زیاد فرۆشیی نەوت کە لە رابردوودا هەبووە، دوابخرێت و لێمان گەڕێن تا قەیرانی دارایی بەرۆکمان بەر دەدات”.

وتیشی: “هەرێمی کوردستان پابەند نەبووە بە کەمکردنەوەی بڕی بەرهەمهێنان و ئەو کارەشیان 79٪ ئاستی پابەندبوونەکانی بەبەرهەمهێنانەوە هێناوەتە خوار کە ئۆپیک بڕیاری لێداوە”.

وەزیری نەوتی عێراق ئاشکرایدەکات “هەرێمی کوردستان پابەند نەبووە بەو رێککەوتنە سەرەتاییەی لەگەڵ ئێمە هەیبوو بە کەمکردنەوەی بەرهەمهێنان بۆ 80 هەزار بەرمیلی رۆژانە و بێ گوێدان بە ئێمە 430 هەزار بەرمیلی رۆژانەی خۆی فرۆشتووە”.