یەکگرتووى ئیسلامى: لەگەڵ پرۆژەى لامەرکەزیداین لە چوارچێوەى قەوارەى هەرێمى کوردستان
لۆگۆى یهكگرتووى ئیسلامى كوردستان | فۆتۆ: SNN
SNN
پەرلەمانتارێکی یەکگرتووی ئیسلامیی کوردستان لە پەرلەمانی کوردستان دەڵێت: “لەگەڵ پرۆژەى لامەرکەزیداین لە چوارچێوەى قەوارەى هەرێمى کوردستان”.
ئەو ئەندامەى پەرلەمانى کوردستان لە فراکسیۆنى یەکگرتووى ئیسلامى راشیدەگەیەنێت “لامەرکەزیەتى دارایی و کارگێڕى لە چوارچێوەى قەوارەى هەرێمى کوردستان یەکێکە لە پێداویستییەکانى ئەمڕۆ بۆ راییکردنى کاروبارى هاووڵاتیان و نەمانى رۆتین و شەفاف بوونى داهاتى پارێزگاکان”.
ئەبوبەکر هەڵەدنى بە SNNى راگەیاند “نابێت هیچ بەربەستێک هەبێت لە بەردەم پرۆژەى لامەرکەزیەت، چونکە ئەو هەموو کەڵەکەبوونى دەسەڵاتە لە مەرکەزدا گرفت و رۆتینى دروستکردووە و پارێزگاکان مافى خۆیانیان پێنەدراوە”.
وتیشى: “ئەگەر حکومەتى هەرێم دەیەوێت چاکسازى بکات و ژیانى خەڵک باش بکات، پێویستە پرۆژەى لامەرکەزى پەسەند بکات و ئێمەش لە یەکگرتووى ئیسلامى لەگەڵ پرۆژەى لامەرکەزى دارایی و کارگێڕیدان بە مەرجێک لە چوارچێوەى قەوارەى هەرێمى کودرستاندا بێت”.
ئاماژەى بەوەشکرد “لامەرکەزیەتى کارگێڕى و دارایى یەکێکە لە پێداویستییەکانى ئەمڕۆ بۆ راییکردنى کاروبارى هاووڵاتی و نەمانى رۆتین و شەفاف بوونى داهاتى پارێزگاکان و خزمەتکردنى پارێزگاکان”.
