“سعودیە و ئیمارات پەیوەندییەکانیان لەگەڵ تورکیا بەهێزدەکەن”

SNN 

سعودیە و ئیمارات هەوڵە سەرەتاییەکانیان خستووەتەگەڕ بۆ ئاساییکردنەوەی پەیوەندییەکانیان لەگەڵ تورکیا ئەوەش بە ئامانجی سوودوەرگرتن لە پەیوەندییە بازرگانییەکان و ئاسایشی ناوچەکە.
بە گوێرەی زانیارییەکانی ئاژانسی هەواڵی بلومبێرگ، ئەو دەستپێشخەریەی ئیمارات و سعودیە بەشێوەی نهێنی و ئاشکراش ئەنجامدراوە و لەدوای ئەوە دەستیپێکردووە کە سعودیە و ئیمارات ناکۆکیەکانیان لەگەڵ قەتەڕی دۆستی تورکیا وەلانا و بڕیاریاندا پەیوەندییەکانیان ئاسایی بکەنەوە.
بەرپرسێکی تورکیا رایگەیاندووە: تورکیا و ئیمارات گفتوگۆیان کردووە سەبارەت بە لابردنی ئەو بەربەستانەی کە لەبەردەم پەیوەندی بازرگانی نێوان هەردوو وڵاتەکە بوونیان هەیە، بەتایبەت دەستپێکردنەوەی گەشتە ئاسمانییەکانی نێوان پایتەختەکانیان کە بەهۆی کۆرۆناوە راگیراوە”.
ئەو بەرپرسە تورکیە کە ئاگاداری گفتوگۆکانە دەڵێت، تا ئێستا پرسی پشتیوانی تورکیا بۆ ئیخوان موسلیم و نیگەرانییەکانی ئەبوزەبی و ریاز لەوبارەیەوە تاوتوێ نەکراوە.
ئەو ئاژانسە ئەمریکیە ئەوەشی بڵاویکردووەتەوە، ئەو دەستپێشخەریە لەکاتێکدایە کە تورکیا و ئیمارات و سعودیە رووبەڕووی سیاسەتی نوێی ئیدارەی جۆو بایدن دەبنەوە کە پێشبینی دەکرێت هەڵوێستی بەرامبەر ئەو سێ وڵاتە توندبێت.