خامنەئی و زەریف دواهەڵوێستی ئێران لەبارەی رێککەوتنە ناوەکیەکە ئاشکرادەکەن

SNN

خامنەئی جەخت لەوەدەکاتەوە لابردنی سزاکانی ئەمریکا لەسەر ئێران تاکە مەرجی پابەندبوونەوەیانە بە مەرجەکانی رێککەوتنی ناوەکی و وەزیری دەرەوەی ئێرانیش هۆشداری دەدات.

رابەری شۆڕشی ئیسلامی ئێران دواهەڵوێستی خۆی لەبارەی پابەندبوونەوەی تاران بە رێککەوتنی ناوەکی خستەڕوو، وتی: “بەتەنیا لەدوای لابردنی سزاکانی ئەمریکا دەگەڕێینەوە بۆ رێکەوتن”.

خامنەئی لە میانی کۆبوونەوەیەکی لەگەڵ فەرماندەی هێزە ئاسمانییەکانی ئێران رایگەیاند: “ئێران تەواوی ئەرکەکانی لە رێککەوتنەکەی جێبەجێکردبوو، جیاواز لە ئەمریکا و وڵاتانی ئەوروپا، ئێستاش ئەگەر ئەو وڵاتانە بیانەوێت تاران پابەندببێتەوە بە مەرجەکانەوە دەبێت تەواوی سزاکانی سەری لاببرێت”.

وتیشی: “ئەمە دوایین بڕیار و هەڵوێستی بەرپرسانی ئێرانە و لەسەری کۆکین”.

لەلایەکی دیکەوە، محەمەد جەواد زەریف، وەزیری دەرەوەی ئێران رایگەیاندووە ئەگەر تا 21ی شوبات سزاکانی ئەمریکا لانەبرێت ئێران پابەندبوونی کەمتر دەکاتەوە.